СЕХ: Орон нутгийн удирдлагуудтай цахим хурал хийлээ

Монгол Улсын Сонгуулийн ерөнхий хорооны дарга П.Дэлгэрнаран, Нарийн бичгийн дарга Д.Даваа-Очир, Тамгын газрын дарга Д.Бат-Эрдэнэ нар аймаг, сумдын Засаг даргын Тамгын газрын дарга, Иргэдийн төлөөлөгчдийн хурлын Нарийн бичгийн дарга болон улсын бүртгэл, цагдаагийн байгууллагын удирдлагуудтай өчигдөр (2024.03.07) цахим хурал хийлээ.

Улсын Их Хурлын 2024 оны ээлжит сонгуулийн үйл ажиллагааг зохион байгуулах бэлтгэл ажлын явцын талаар Сонгуулийн ерөнхий хорооны дарга П.Дэлгэрнаран хурлын эхэнд мэдээлэл өгсөн юм.

Сонгуулийн хороод болон мэдээллийн технологийн багийн гишүүн, даамлаар ажиллах төрийн албан хаагчдын нөөц бүрдүүлэх, тэдэнд цахим системээр сургалт зохион байгуулах, гэрчилгээ олгох, гэрчилгээтэй албан хаагчдыг давтан сургах талаар орон нутгийн удирдлагуудтай мэдээлэл солилцлоо. “Сонгуулийн мэдээллийн нэгдсэн сан” (www.e-election.mn) цахим системийг ашиглах арга зүйн сургалт зохион байгуулах, сонгуулийн бэлтгэл ажлын явцын талаар судалгаа хийх, байнга оршин суугаа хаягаасаа өөр газарт ажиллаж байгаа иргэдийн сонгох эрхийг хангах арга зүйн зөвлөгөө өгөх зорилгоор Сонгуулийн ерөнхий хорооны албан хаагчид орон нутагт ажиллахыг мөн мэдээлэв. Цахим хуралд Засгийн газрын хэрэг эрхлэх газрын дэд дарга У.Бямбасүрэн, Нийслэлийн Засаг даргын Тамгын газрын Хууль, эрх зүйн хэлтсийн дарга Д.Амгалан болон аймаг, сумдын 480 албан хаагч оролцлоо.