Монголын үндэсний шигшээ багийн урьдчилсан бүрэлдэхүүнийг зарлалаа

Монголын Үндэсний шигшээ баг 2024 оны эхний цугларалтаа энэ сарын 18-26-ны хооронд болох ОУХБХ-ны шигшээ багуудын өдрийн хүрээнд манай улсын шигшээ баг Азербайжан улсыг зорьж, "FIFA Series" албан ёсны нөхөрсөг тоглолтод оролцох юм.

Тодруулбал 03 сарын 22-нд талбайн эзэн ОУХБХ-ны чансааны 113-р байранд эрэмбэтэй Азербайжаны шигшээ багтай тоглох ба 03 сарын 25-нд Африк тивийн Танзанийн шигшээ багтай (119-д эрэмбэтэй) тус тус тоглох билээ.

Тэгвэл Үндэсний шигшээ багийн албаны зүгээс энэ удаагийн шигшээ багийн урьдчилсан бүрэлдэхүүнд нийт 31 тоглогчийг сонгон дуудсан бөгөөд 03 сарын 18-ны өдөр эцсийн байдлаар 23 тоглогчийн нэрсийг зарлах юм.

Дуудагдсан тоглогчдоос онцлох нь Европ тивийн Чехийн "Динамо Ческе-Будёёвице" клубийн академид суралцан 19 хүртэлх насны багт тоглож байгаа Гантогтохын Төгөлдөр анх удаагаа шигшээ багтаа дуудагдлаа.

Үндэсний шигшээ баг эх орноосоо 03 сарын 19-ний өдөр Азербайжан улсын нийслэл Баку хотыг зорих юм.