Ч.Хүрэлбаатар: Энэ засаг ард түмний төлөө биш, хэдэн сайд, дарга нарын төлөө ажилласан

Ээлжит бус чуулганаар Ерөнхий сайд Ж.Эрдэнэбатыг танхимын хамт огцруулах эсэхийг хэлэлцэж байгаа билээ. Тус чуулганд үг хэлж буй гишүүд олон янзын байр суурь илэрхийлж байна. Ингээд УИХ-ын гишүүдийн үгийг үргэлжлүүлэн хүргэе. 

Н.Номтойбаяр: Би Засгийн газрын гишүүн болсноороо 1000 гаруй ажилтантай компаниа хаах байсан юм уу. Ашиг сонирхлын зөрчилтэй гэх юм. Надад лав тийм юм байхгүй. Монгол Улсаа хөгжүүлэх нэг л зорилготой. Хөгжлийн банкнаас зээл авсан гээд шүүмжлээд л байсан. Ажлын байр нэмэгдэж, Хятадаас цемент авахаа больсон шүү дээ. Сайдын 17 суудалд 65-уулаа багтахгүй учраас л өнөөдөр засгаа огцруулах асуудлыг сөхөж байгаа нь үнэн. Юу үнэн, тэр үнэн.

Н.Учрал: Төр бол ард түмнээс олж авсан эрх мэдэл. Ард түмнээс авсан эрх мэдлийг ард түмэнд нь л зориулах хэрэгтэй. Тиймд ард түмэнд хамгийн эхэнд юу хэрэгтэй байна вэ гэдгийг эрэмбэлэх хэрэгтэй байсан. Концессын гэрээг ахиж хийхгүй гэсэн шийдвэр гаргачихаад түүнийгээ зөрчөөд явчихсан. Ард түмэнд цэцэрлэг, сургууль хүрэлцэхгүй байхад 807 тэрбумыг концессыг гэрээгээр сайд нартаа өгөх нь хэр зөв эрэмбэ юм бэ. Засгийн газар эрх ашгийн эрэмбээ тодорхойлоод, ард түмэнд хэрэгтэй ажлуудын дарааллыг тогтоох ёстой байсан. Оюуны өмчийн газраа татан буулгачихаад оюуны боловсролоор дэлхийд гарна гээд яриад сууж байгаа улс манайхаас өөр байхгүй. Дэлхийд газрын баялгаараа 8-д орж байгаа улсын ард түмэн өнөөдөр ингэж амьдарч байгаад би ичиж байна. Засгийн газарт хариуцлага тооцож, шударга ёсыг бий болгохын төлөө гарын үсэг зурснаараа яагаад гүтгүүлж доромжлуулах ёстой юм бэ. Яагаад хаа хамаагүй хэргээр АТГ-т дуудагдах ёстой юм бэ. Надад ямар нэгэн ашиг сонирхол байхгүй.

Ч.Хүрэлбаатар: Улстөрч хүний хувьд ард түмний итгэл байдаг. Ард түмнийхээ итгэлийг алдсан улстөрч улс төрийн тавцангаас арчигддаг. Ард түмний итгэлийг алдсан Засгийн газар улс орныхоо эрх ашгийг хохироодог. 2016 онд ард түмэнд бидэнд маш их итгэсэн. Энэ их итгэл өнөөдөр алга болжээ. Хумхын тоос мэт. Засгийн газрын буруугаас болж энэ итгэл алга болсон. Шийдвэр гаргахдаа мэргэжлийн бус, тодорхойгүй, эргэж буцсан олон шийдвэр гаргасан. Энэ Засгийн газар Монгол Улсын эрх ашиг, ард түмний төлөө зүтгэх ёстой байсан. Харамсалтай нь энэ Засгийн газар хэдэн сайд нарынхаа төлөө, дарга нарынхаа төлөө зүтгэсэн. Ингэж төрийн ажлыг хийдэг засгийн газрыг би энэ амьдралдаа үзээгүй. Сайд нартаа концессын гэрээ өгчихөөд сууж байж болдог юм уу. Дарга нарын компанид төсвийн мөнгө очиж байна. Төрийн албан хаагчдыг дотор нь хуваагаад хаячихсан. Ингэж Монгол төрийн ажлыг хийж болохгүй ээ. Энэ бүгдийг хажуугаар бид нүдээ аниад, нэгнийхээ дал мөрийг алгадаад найзан дундаа яваад байх уу. Болно л доо. Гэхдээ ард түмэн маргааш бидний дал мөрийг алгадахгүй, харин хөлийг хавсарч унагах болно. Элдэв бусаараа дуудуулан байж 31 гишүүн гарын үсэг зурсан. АН-тай хамтарсан юм байхгүй. 

• Д.Эрдэнэбат: Энэ УИХ ер нь тарчихвал яасан юм бэ

• С.Жавхлан: Хэрүүл хийгээд засгаа хоосон байлгаад байх юм бол 90 жилийн түүхтэй чинь ярина шүү

• Я.Содбаатар: Гарын үсэг зурсны төлөө буруутгаж, дарамталсан

• С.Бямбацогт: Би ажлаа өгөөд концессын гэрээтэй холбоотой асуудлыг шалгуулна

• Б.Пүрэвдорж: УИХ-ын шинэ гишүүд хэтэрхий их ямба сууж байна 
  

Б.Хурцболд