Я.Содбаатар: Гарын үсэг зурсны төлөө буруутгаж, дарамталсан

Ж.Эрдэнэбатын Засгийн газрыг огцруулах асуудлыг УИХ-аар хэлэлцэж байна. Үүнтэй холбоотойгоор УИХ-ын гишүүд үг хэлж байна. Ө.Энхтүвшин, Ч.Улаан, Я.Содбаатар, Г.Тэмүүлэн нарын яриаг хүргэе. 

Ө.Энхтүвшин: Энэ цаг үед уг нь бид 80 сая малаа энэ өвөл яаж авч гарах вэ, үр тариа, хадлан тэжээл юу болж байна, хоёр сарын дараа төлөх бондын өрөө яах вэ гэдэг асуудлыг ярьж байх ёстой байлаа. Тиймээс цаг үеэ олоогүй гэж хэлэх гээд байна. Энэ Засгийн газрын хийсэн бүхнийг эцсийн эцэст 65-ын бүлэг маань л чиглүүлж өгсөн. Энэ 65 гишүүн тэгвэл ямар хариуцлага хүлээх ёстой юм бэ. Засгийн газар руугаа бүх юмаа чихчихээд ямар ч гэмгүй үлдэх юм уу.

Тиймээс би дотроо юмаа ярья гэж мөн ч их гуйсан даа. Удирдах зөвлөл, бага хурал дээрээ ярих ёстой байсан. Хоёр сарын дараа намын их хурал болно. Тэр үед шинэ намын дарга гарч ирнэ. Тэр хүн нь Ерөнхий сайд болоод Засгийн газраа байгуулаад яв л даа. Хоёрхон сар хүлээчих.

Г.Тэмүүлэн: Ард түмэн МАН-д асар их итгэлийг олгосон. Энэ хүлээлт битгий талаар болоосой гэж би бодож байна. Уг нь нэг жил гэдэг Засгийн газарт хариуцлага тооцоод байх, дүн тавиад байх хугацаа биш. Шүүмжлэх асуудал мэдээж байгаа. Өргөс авчихсан юм шиг нэг өдөр бүх юм засарна гэж юу байх вэ. Засаг солигдвол эдийн засаг дахин сэргэхгүйгээр унаж магадгүй. Засгийн газар огцроод сайжирдаг бол 16 засаг солигдоод юу хожсон юм бэ. Лай ланчгийг нь ард түмэн үүрч байсан шүү. Ийм байдал бүү давтагдаасай гэж би хүсч байна. Засгийн газар огцроод хэзээ ч сайн зүйл болж байгаагүй.

Н.Цэрэнбат: Гишүүд минь ээ, олгой хагаравч тогоон дотроо байя. Тэгээгүйн улмаас одоо бид 60 тэрбумынхан гэдэг нэр хочтой боллоо. Өнөөдөр өмнөх 10 жил талбай дээр хашгирсан биднийг муухай харагдуулах муу нэр биеллээ олох гэж байна. Энэ нэр биднийг дахиад 10 жил муухай харагдуулах гэж байна.

Я.Содбаатар: УИХ-ын гишүүд бүрэн эрхийнхээ хүрээнд Засгийн газрыг огцруулах бичигт гарын үсэг зурсан гэж ойлгож байгаа. Гэтэл түүнийх нь төлөө намын одоогийн удирдлагаас буруутгаж, яллах гээд байгаа хандлага ажиглагдаж байна. Амаргүй дарамттай тулгарч байж гарын үсэг зурсан. Концессын асуудлыг бүлэг дээр хоёр удаа ярьсан. Бүлэг дээр энэ концессыг боль гэж шийдвэр гарсан. Гэтэл одоо хамт шийдчихээд одоо буруутгалаа гэж яриад байна. Тийм юм болоогүй. УИХ дахь МАН-ын 65 гишүүн хагараагүй, хуваагдаагүй. Харин олонхи нь Засгийн газартайгаа хариуцлага тооцох тухай л ярьж байгаа болохоос сөрөг хүчинтэйгээ нэгдээд, хуйвалдаад байгаа асуудал байхгүй ээ. Цаашид МАН-ын бүлэг бурууд хатуу байж, хамтдаа цаашаа явах тухай л яриа. Түүнээс биш, алдаа бүхнийг нь хаацайлах тухай яриа байж таарахгүй.

Ч.Улаан: Өнөөдрийг хүртэл би аль ч туйлыг хатуу баримтлаагүй байсан. Гэхдээ шийдвэр гаргах мөч ойртоод ирэхээр асуудлууд тодорхой болж байна. Гэхдээ ойлгомжгүй байдлууд гарч байна. Гэтэл тусгай хяналтын дэд хороо яахаараа нээлттэй, хэн хүссэн нь ороод сууж болдог юм бэ. Тэр хурлын явцыг тус хорооны гишүүн биш, шал өөр хүн зарлаад яриад байгааг ойлгохгүй байна. Энэ бүхэн эцсийн дүндээ У.Хүрэлсүхийг буруутгахын төлөө яваад байна уу даа гэж харагдаж байна. Ж.Эрдэнэбат Ерөнхий сайд болоход дэмжиж байсан. Гэвч энэ хүнийг систем нь дарж унагалаа. Аливаа бохир, буруу систем ямар ч сайн хүнийг чирдэг юм байна. Тиймээс бид өөрчлөлт, зарчмын шинэчлэл хийхээс аргагүй болжээ. 

• Д.Эрдэнэбат: Энэ УИХ ер нь тарчихвал яасан юм бэ

• С.Жавхлан: Хэрүүл хийгээд засгаа хоосон байлгаад байх юм бол 90 жилийн түүхтэй чинь ярина шүү

• Ж.Батзандан: МАН-ын Засгийн газар Ц.Элбэгдоржийн хавханд орж уналаа

• Ч.Хүрэлбаатар: Энэ засаг ард түмний төлөө биш, хэдэн сайд, дарга нарын төлөө ажилласан

• Б.Пүрэвдорж: УИХ-ын шинэ гишүүд хэтэрхий их ямба сууж байна 
  

Б.Хурцболд

WWW.ZINDAA.MN