“Үхлийн” хэсгээс “Боруссиа”, “Реал” амьд гарлаа

Европын хөлбөмбөгийн холбооны хамгийн нэр хүндтэй тэмцээн “Аваргуудын лиг”-ийн тэмцээний 2012-2013 оны улирлын тоглолт үргэлжилж байна. 58 дахь удаагийн тэмцээнд буурал тивийн 17 улсын шилдэг 32 баг найман хэсэгт өрсөлдөж байгаа бөгөөд өнгөрсөн шөнө “А”, “В”, “С”, “D” хэсгийн тавдугаар тойргийн тоглолт боллоо. Өчигдөр “А” хэсгээс Португалийн “Порту”, Францын “Пари Сан Жермен” клуб ялалт байгуулснаар дараагийн шатанд өрсөлдөх эрхээ халааслав. Харин хэн нэгээр гарах нь сүүлийн тоглолтод хооронд тулаанаар шийдэгдэнэ. Харин “В” хэсгээс “Шальке”, “Арсенал” талбай дээрээ ялалт байгуулснаар шилдэг 16 багийн тоонд багтлаа. Тэд сүүлийн тойрогт айлын талбайд зочлон тоглох бөгөөд гурван оноо авсан баг нь хэсгээ тэргүүлэх боломжтой юм. “С” хэсгээс Испанийн “Малага” ОХУ-ын “Зенит”-тэй талбай дээр нь 2:2-оор тэнцсэнээр Санкт-Петербургийн багийн хувьд дараагийн шатанд өрсөлдөх эрх нь үгүй боллоо. Тэд сүүлийн тоглолтоо “Милан”-ы “Сан Сиро” цэнгэлдэх хүрээлэнд хийх бөгөөд өрсөлдөгчөө дор хаяж зургаагаас дээш бөмбөгний зөрүүтэй хожиж, байж хасагдар шатанд өрсөлдөх онолын боломж бий. Гэхдээ энэ бараг боломжгүй зүйл юм. Харин “D” хэсэг буюу “Үхлийн” хэсгээс Герман, Испанийн аваргууд дараагийн шатанд өрсөлдөх эрхээ халаасаллаа. “Боруссиа” “Аякс”-ыг Амстердам хотод нь 4:1-ээр бут ниргэсэн бол эзэн хааны баг Манчестер хотын “Этихад”-ад талбайн эзэдтэй 1:1-ээр эвийн гэрээ байгуулав.

“А” хэсэг

Динамо Киев (Украин) - ПСЖ (Франц) 0:2

Гоол: Эсекьель Лавесси, 45, 52

Порту (Португал) - Динамо Загреб (Хорват) 3:0

Гоол: Лучо Гонсалес 20, Жуан Моутинью 67, Силвестре Варела 85

“В” хэсэг

Арсенал (Англи) - Монпелье (Франц) 2:0

Гоол: Жек Уилшир 49, Лукас Подольски 63

Шальке (Герман) - Олимпиакос (Грек) 1:0

Гоол: Кристиан Фукс 77

“C” хэсэг

Зенит (ОХУ) - Малага (Испани) 2:2

Гоол: Данни 49, Виктор Файзулин 86 - Диего Буонанотте 8, Себастьян Фернандес 9

Андерлехт (Бельги) - Милан (Итали) 1:3

Гоол: Том Де Суттер 78 - Стефан Эль-Шаарави 47, Филипп Мексес,71, Алешандре Пато 90+1

“D” хэсэг

Аякс (Нидерланд) - Боруссиа (Герман) 1:4

Гоол: Дэнни Хусен 86 - Марко Ройс 8, Марио Гётце 36, Роберт Левандовски, 41, 67

Манчестер Сити (Англи) - Реал (Испани) 1:1

Гоол: Серхио Агуэро 74 - Карим Бензема 10

Б.Бат