Рондо зодоонд оролцож, гайхалтай амжилт нь тасалдав

NBA-гийн 2012-2013 оны улирлын тоглолт үргэлжилж байна. Өнөөдөр “Дорнод” бүсийн “Бостон Селтикс”, “Бруклин Нетс” багийн дуэлийн үеэр тоглогчдын хооронд багахан хэмжээний зодоон боллоо. Тодруулбал тоглолтын хоёрдугаар үе өндөрлөхөөс 30 секундын өмнө “Бостон”-ы довтлогч Кевин Гарнеттийг довтолж байх үеэр эсрэг багийн Крис Хамфриес нүүр лүү нь цохиж, бүдүүлэг алдаа гаргасан. Харин үүний дараа “Бостон”-ы холбон тоглогч Ражон Рондо Хамфрис руу дайрч, багахан зодоон болсон юм.  Тэд хоёулаа талбайгаас хөөгдсөнөөс гадна Кевин Гарнетт, Жералд Уоллес нар техникийн алдаа авчээ. Энэхүү тоглолтод “Кельтүүд”-ийн тархи Ражон Рондогийн 37 тоглолт дараалан 10-аас дээш оноо болон дамжуулалт гүйцэтгэсэн амжилт нь зогслоо. Тэрбээр ердөө есөн тоглолтод дээрх үзүүлэлтэд хүрсэн бол алдарт сагсан бөмбөгч Мэжик Жонсоны тогтоож байсан дээд амжилтыг эвдэх боломжтой байсан юм. Гэсэн ч тэрбээр өнөөдөр биеэ барьж чадаагүйн улмаас гайхалтай амжилт нь тасарлаа.

Б.Бат