Харүмафүжи: Өөртөө маш өндөр шаардлага тавьсан

Японы мэргэжлийн сумо бөхийн 70 дахь аварга Харүмафүжи Бямбадорж эх орондоо иржээ.

Тэрээр Японы эрдэмтэн судлаач Окада Хидэхирогийн “Монголын эзэнт гүрний мандал, буурал” нэртэй номыг монгол хэл дээр хэвлүүлэн гаргахад ивээн тэтгэсэн бөгөөд энэхүү номоо өчигдөр Японы элчин сайд яам, “Шинэ Монгол” бүрэн дунд сургуулийн сурагчдад гардуулан өгсөн юм. Японы нэрт эрдэмтэн Окада Хидэхирогийн бичсэн уг номыг Р.Баттогтох эх хэлнээ хөрвүүлжээ. Энэхүү арга хэмжээний үеэр сумогийн 70 дахь аварга Харүмафүжитэй цөөн хором ярилцлаа.

-Та ёкозуна болсноос хойш эх орондоо ирээгүй. Сэтгэгдлийг тань сонсмоор байна?

-Японы сумогийн 70 дахь аварга болсондоо баяртай байгаа. Ёкозуна болсныхоо дараа эх орондоо ирэхийг маш их хүссэн. Гэвч аварга цолтой хүн олон арга хэмжээнд оролцох ёстой байдаг. Тийм учраас ирж чадаагүй. Бас бэлтгэл сургуулилтаа сайн хийх ёстой байсаар цаг их давчуу байсан юм. Харин арваннэгдүгээр сарын башё дуусгаад гэртээ хурдан очихыг хүссэн учраас даваа гаригт Монголдоо ирлээ. Гэртээ ирсэн чинь маш сайхан байна.

-Хэд хоногийн чөлөөгөөр ирсэн юм бэ?

-Баасан гаригт /маргааш/ буцна. Ер нь бол цаг жаахан давчуу байгаа.

-Их сонирхолтой номын ивээн тэтгэгчээр ажиллажээ. Яагаад ивээн тэтгэх болов?

-Монголын их хаад, түүх соёлын талаар судалгаа хийдэг гадаадын маш олон эрдэмтэн байдаг. Орос, Англи, Америк, Хятад, Солонгос гээд л. Гэхдээ бүгд өөр өөрийн гэсэн байр суурь, өөр өнцгөөс харж бичсэн байдаг юм билээ. Хамгийн сонирхолтой санагдсан эрдэмтэн Окада Хидэхирогийн ном байгаа юм. Элчин сайд Такэнори Шимизүтэй уулзаж байхад энэхүү номны талаар мэдээлэл өгч, монгол хэлнээ хөрвүүлэн гаргахад ивээн тэтгэхийг санал тавьсан. Би ч энэ саналыг дуртай хүлээж авсан. Өнгөрсөн жил элчин сайд бид хоёр хоол идэж байхдаа ярилцсан ажил маань өнөөдөр биелэлээ олж ард түмэнд, миний дүү нар, эх орны ирээдүйн эздэд хүрч байгаад чин сэтгэлээсээ баярлаж байна. Монголчууд маань “Монголын эзэнт гүрний мандал, буурал”-ыг ширээнийхээ ном болгоно гэдэгт итгэж байгаа. Номонд дургүй монгол хүн байхгүй болсонд хувийн зүгээс баяртай байна. Энэ номыг уншаад хүн бүр түүхээрээ бахархаж, омогшоосой гэж хүсье.

-Ёкозeна болсон сэтгэгдлээ хамгийн түрүүнд хэнтэй хуваалцсан бэ?

-Ээжтэйгээ хуваалцсан. Тэр үед өөрийн эрхгүй сэтгэл хөдлөөд, нулимс унагасан. Аав минь амьд сэрүүн байсан бол гэж бодлоо. Гэр бүл, ах дүү нартаа аварга цолоор бэлэг барьж, мэргэжлийн сүмод барилдаж байгаа зорилгынхоо нэг хэсэгт хүрч чадсандаа баяртай байгаа. Цаашид ч гэсэн улам хичээж барилдах болно.

-Аварга цолтойгоор анхны башёдоо барилдлаа. Гэвч зургаа унасан. Энэ талаар юу хэлэх вэ?

-Ёкозeна болоод анхны башёдоо барилдсан. Башёгийн хоёр дахь өдрийн барилдаанд маэгаширад унасны дараа дахин унах ёсгүй гэсэн шаардлагыг өөртөө тавьсан. Гэвч барилдаан маань нэг л болж өгсөнгүй. Гэхдээ цаашид ийм барилдаан гаргахгүй ээ. Ёкозуна хэмээх том цолны нэр төрийг хамгаалж барилдах болно.

-Башёгийн өмнөх бэлтгэл хэр байсан бэ?

-Хангалттай сайн байсан гэж хэлмээр байна. Бэлтгэлийн тал дээр ямар ч асуудал байхгүй. Хакухо аваргатай л гэхэд би 30 гаруй удаа хамтарсан бэлтгэл хийж барилдсан шүү дээ.

-Таныг Монгол руу ирж байх хооронд Ёкозунагийн зөвлөл хуралдсан байна лээ. Энэ талаар ямар мэдээлэлтэй байгаа вэ?

-Надад мэдэгдсэн л дээ. Гэхдээ яг тодорхой мэдээлэл аваагүй байгаа учраас энэ талаар одоо яриад хэрэггүй байх. Мэдээж аварга цолтой бөх олон удаа унасан нь сумогийн холбооныхонд таалагдаагүй биз. Надад хүлээлгэсэн энэ том цолны нэр төрийг цаашид хамгаалан барилдах болно гэдгээ дахин хэлмээр байна.

-Гэртээ ирээд амарч чадав уу?

-Тухтай амарч чадахгүй л байна. Маргааш л /өнөөдөр/ сайн амарч аваад буцна даа.

-Японд очоод шууд бэлтгэлдээ орох уу?

-Бараг л тэгэх байх. Гэхдээ бэлтгэлээс өмнө оролцох ёстой 2-3 арга хэмжээ бий.

-Тантай хамт монгол сумочдоос ирсэн үү?

-Ирээгүй. Би башё дууссанаас хойш бусадтайгаа уулзаж амжаагүй байна. Монголд яаралтай ирэх ёстой байсан учраас башё дууссаны маргааш шууд ирсэн.

-Цаг гаргаж ярилцсанд баярлалаа?

-Та бүхэнд ч гэсэн баярлалаа. Намайг дэмжиж байгаа Монголын ард түмэндээ баярлаж байгаагаа энэ дашрамд илэрхийлье. Та бүхний итгэлийг алдахгүй улам сайн хичээж барилдах болно. Цаашид олон түрүү авахын тулд бэлтгэл сургуулилтаа маш сайн хийнэ.

Эх сурвалж: “СПОРТЫН ШУУДАН”