Мальдонадо “Уильямс” багт дахин нэг улирал хүчин зүтгэнэ

Автомашины хаан уралдаан “Формула-1”-ийн “Уильямс” багийн удирдлага венесуэль нисэгч Пастор Мальдонадотой шинэ гэрээ байгуулав. Их Британийн баг түүнд ирэх жил дахин итгэл хүлээлгэхээр нэг жилийн гэрээ үзэглэжээ. Өдгөө 27 настай Мальдонадо хоёр жилийн өмнөөс “Их хурд”-д уралдаж эхэлсэн бөгөөд энэ жилийн Испанийн гараанд түрүүлж, улсынхаа түүхэнд байгаагүй амжилтыг үзүүлсэн. Түүнчлэн нийт 45 оноо авч, нийлбэр дүнгээр 15 дугаар байрт орсон юм. Харин түүний хамтрагч “Формула-1”-ийн домогт тамирчин Айртон Сенна агсны хүү Бруно Сенна “Уильямс”-тай гэрээгээ сунгахаас татгалзсан. Тиймээс тэд туршин нисэгч Финландын Валттери Боттасыг ирэх улиралд хоёрдугаар нисэгчээр уралдуулахаар болжээ.

Б.Бат