Мерфи хасагдаж, Фишер “Даллас”-тай нэгдэв

2011 оны NBA-гийн аварга “Даллас Маверикс”-ийн удирдлага хүчний довтлогч Трой Мерфиг багаасаа хассаныг “The Dallas Morning News” мэдээллээ. Техасын баг шинэ улиралд долоон хожил, есөн хожигдолтой “Өрнөд” бүсийн 11 дүгээр байрт яваа. Багийн лидер Дирк Новицки нь бэртэлтэй байгаа энэ үед “Даллас”-ын удирдлага түүний байрлалд Трой Мерфиг улирлын өмнө багтаа нэгтгэсэн. Гэсэн ч тэрбээр “Даллас”-т 14 тоглолтод оролцохдоо 4.6 оноо түүж, 3.5 удаа самбараас бөмбөг авсан бөгөөд багийн удирдлагын итгэлийг олж чадаагүй юм. Тиймээс Техасын баг Мерфиг багаасаа хасч, хашир туршлагатай холбон тоглогч Дирек Фишерийг эгнээндээ нэгтгэлээ. Өдгөө 38 настай ахмад тоглогч Фишер NBA-гийн “Лос-Анжелес Лейкерс”, “Голден Стейт Уорриорз”, “Юта Жазз”, “Оклахома Сити Тандер” багт 16 улирлыг өнгөрөөхдөө дунджаар 8.6 оноо авч, 3.1 дамжуулалт өгсөн юм. Түүнчлэн тэрбээр “Нуурууд” бүрэлдэхүүнд таван удаа NBA-гийн аварга болж байв.

Б.Бат