Амьдаа бөхчүүд
Уран барилдаант улсын өсөх идэр начин Эрдэнэбилэгийн Энхбатын амьдаа нарыг энэ удаа онцоллоо. Баянхонгорын Д.Батболд харцагын дүү аймгийн арслан Энхбат, мөн аймгийн начин цолтой олон Энхбатууд өнөөдөр Монгол бөхийн өргөөнд сайн хүч үзэцгээж байна.
1. Булган аймгийн Могод сумын харьяат улсын өсөх идэр начин Эрдэнэбилэгийн Энхбат. 2008 оны төрийн наадамд Н.Ганбаатарт унасан бол хойтон жил нь улсын гарьд И.Доржсамбуугаар тав давж улсын начин цол хүртсэн. 2010, 2011 онуудад дараалан гурав давсны эцэст 2012 оны улсын их баяр наадамд тав давж начин цолоо баталсан. МБӨ-нд түрүүлж үзүүрлэн олон удаа дээгүүр хүч үзсэн, энэ цагийн шилдэг уран барилдаанч бөхчүүдийн нэгэн билээ.
2. Баянхонгор аймгийн Баянбулаг сумын харьяат аймгийн арслан Даш-Очирын Энхбат. Улсын харцага Д.Батболдын төрсөн дүү. 2006 онд Баянхонгор аймгийнхаа баяр наадамд хүч үзсэн 256 бөхөөс улсын начин Б.Сэр-Одыг орхин түрүүлж аймгийн арслан цол хүртсэн. 2011 оны улсын наадамд гурав давсан. Мөн л монгол бөхийн өргөөнд АЦЦБЗББ-нд тогтмол сайн хүч үздэг бөх.
3.Сүхбаатар аймгийн Наран сумын харьяат аймгийн арслан Цагаанхүүгийн Энхбат. 2004 онд аймгийнхаа баяр наадамд Өвөрхангайн М.Батлутыг орхиж түрүүлэн аймгийн арслан цолонд хүрсэн. Улаанбаатарт хамгийн сүүлд Гиннесийн номд бүртгүүлэх барилдаанд хүч үзсэн байх.
4. Говь-Алтай аймгийн Шарга сумын харьяат аймгийн заан Чулуунбатын Энхбат. 2006 онд аймгийнхаа баяр наадамд их шөвөгт, 2007 онд үзүүрлэж аймгийн цол хүртсэн.
5. Дундговь аймгийн Эрдэнэдалай сумын харьяат аймгийн начин Батсуурийн Энхбат. Аймгийн арслан А.Алтанхуягийн хамаатан бөх. 2007 онд аймагтаа барилдсан 256 бөхөөс тав давж аймгийн начин болсон.Түшээтханы аварга дэвжээний энэ бөхтэй ижил Б овогтой хоёр ч Энхбат бий.
6. Ховд аймгийн Алтай сумын харьяат аймгийн начин Батнасангийн Энхбат. 2009 онд Ховд аймгийнхаа баяр наадамд 256 хүчитнээс тав давж аймгийн начин цолонд хүрчээ.
7. Төв аймгийн Баянчандмань сумын харьяат аймгийн начин Баярцэнгэлийн Энхбат. 2010 онд Төв аймагтаа начин болсон. Аварга биеийн тамирын дээд сургуулийн анхны үндэсний бөхийн ангийн оюутан. Б.Сангисүрэн тэргүүтэй олон аймгийн арслантай эдний ангийг манай уншигчид сайн мэдэх билээ.
8. Хөвсгөл аймгийн Шинэ-Идэр сумын харьяат аймгийн начин Лхагвасүрэнгийн Энхбат. Орон нутагтаа амьдарч Мөрөн хотноо болж байгаа барилдаануудад сайн хүч үздэг энэ бөх 2012 оны зун улсын начин Б.Бадралаар тав давж аймгийн цолонд хүрсэн.
9. Төв аймгийн Цээл сумын харьяат аймгийн начин Ц.Энхбат. 2011 онд Төв аймагтаа тав давж аймгийн начин болсон.
10. Төв аймгийн Бүрэн сумын харьяат сумын заан Сумъяагийн Энхбат. 2012 онд Өндөрширээт суманд түрүүлсэн, Их шавийн дээд сургуулийг төгссөн.
Холбоотой мэдээ
Сэтгэгдэл ( 0 )