Ч.Санжаадамбын барилдах эрхийг хоёр сараар хаслаа

2013 оны 2-р сарын 26-ны өдөр МҮБХ-ны тэргүүлэгчид хуралдаж дараах асуудлыг хэлэлцэн шийдвэрлэсэн байна. Тодруулбал, Монгол улсын заан Ч.Санжаадамбын барилдах эрхийг 2 сараар хассан аж. Учир нь Усан могой жилийн сар шинийн баярт зориулсан барилдааны дөрвийн даваанд барилдахдаа "Монголын үндэсний бөхийн барилдааны дүрэм"-ийн 4.4-ийн "д"-д заасан гутлын өлмий дээр гишгэж мэх хийж унагавал дахин барилдуулна гэсэн заалтын дагуу хөлийн цэц дахин барилдуулахаар шийдвэрлэснийг эсэргүүцэж, дайрч давшлах, бүдүүлэг үг хэлэх зэргээр төрт ёсны их баяр-ёслолын үеэр олон нийтийн өмнө жудаггүй зан гаргасан учраас дээрх шийдвэрийг гаргаад байна. Мөн дүрмийн 7.3-ийн "г" заалтыг үндэслэн улсын заан Чимэдрэгзэнгийн Санжаадамбын барилдах эрхийг хоёр сарын хугацаагаар түдгэлзүүлж гурав давсан бөхийн байг олгохгүй байхаар тогтжээ.