МЧБХ-ны ерөнхий нарийн бичгийн даргаар Э.Сайнсанаа, ерөнхий менежерээр Д.Батням томилогдов

МЧБХ-ны шинэ ерөнхийлөгч Д.Дагвадоржийн шийдвэрээр тус холбооны ерөнхий нарийн бичгийн даргаар Э.Сайнсанаа, ерөнхий нарийн бичгийн даргын орлогч, ерөнхий менежерээр Д.Батням томилогдлоо.

Ерөнхий нарийн бичгийн дарга Энхболдын Сайнсанаа нь япон судлаач мэргэжилтэй, Хүмүүнлэгийн ухааны их сургууль, Японы Үцүномияагийн их сургууль төгссөн. Үндэсний хөрөнгө оруулалтын банкны Бизнес хөгжлийн газарт ажиллаж байгаад энэ оноос “Нэйшнл инвестмент менежмент” компанид төслийн ахлах менежерээр ажиллаж байна. “Асашёорюү сан”-гийн гүйцэтгэх захирал.

2009 оноос МЧБХ-ны гадаад харилцааны орон тооны бус ажилтнаар ажиллаж байсан.

Ерөнхий менежер Даваажавын Батням нь ХААДС болон Их шавийн биеийн тамирын дээд сургууль төгсөж дасгалжуулагчийн мэргэжил эзэмшсэн. Их шавийн биеийн тамирын дээд сургууль, БТСХ-ны Спортын анагаах ухааны албанд ажиллаж байсан. Чөлөөт бөхийн “Хөх чоно” клубын дасгалжуулагч. Чөлөөт бөхийн спортын мастер, насанд хүрэгчдийн УАШТ-нээс мөнгө, хүрэл, залуучуудын УАШТ-нээс 4 алтан медаль хүртэж байсан, дасгалжуулагчаар 13 жил ажилласан.