Сумдын наадмаар төрсөн шинэ цолтнууд хэний хэн бэ

Их Монгол Улс байгуулсны 807 жил, Хүннү  гүрэн  байгуулагдсаны 2222, Үндэсний эрх чөлөөний хувьсгалын 102, Ардын хувьсгалын 92 жилийн ойн үндэсний их баяр наадам монгол орон даяар үргэлжилж байна. Ард олны хамгийн үзэх дуртай байдаг сумдын баяр наадам хаа сайгүй өрнөж байна. Одоо 90 жилийн түүхт ойгоо тэмдэглэж байгаа сумдаас бусад нь бараг наадмаа хийгээд байгаа юм.

Архангай

Батцэнгэл сумын баяр наадамд залуу бөх Эрдэнэхүү түрүүлж сумын заан цол, Содномдэлгэр үзүүрлэж сумын начин цол хүртэв. Шөвгийн 4-т Сумын заан Жавхалантөгс, залуу бөх Уламбаяр нар шалгарчээ.

Баянхонгор

Богд суманд сумын начин Болдбаатар түрүүлж цолоо ахиулсан бол үзүүрт Аранжингийн Болд шалгарчээ. Тус сумын шигшээ барилдаанд Баянлиг сумын харьяат Шонхор-Олимп сургуулийн оюутан Цэрэннадмидын Болдбаатар түрүүлж сумын начин цол хүртсэн байна. Шонхорын Болдбаатарын хувьд 1995 оны хүүхэд бөгөөд энэ жилийн өсвөрийн улсын аваргад дээд насанд оролцох шилдэгүүдийн нэг юм.

Баянлиг суманд 96 бөхөөс Шийрэвдоржийн Эрдэнэбаяр түрүүлж сумын заан цол, хоёр түрүүлсэн сумын заан Сүхбатын Эрдэнэбаяр үзүүрлэв. Гуравт Мянгансүрэнгийн Уламбаяр шалгарсан байна. Шигшээ 64 бөхийн барилдаанд Богд сумын харьяат БХИС-ийн оюутан Энх-Амгалангийн Өлзийбаяр түрүүлж сумын начин цол хүртжээ.

Дорнод

Дашбалбар суманд сумын заан Б.Батболд түрүүлсэн.

Булган

Гурванбулаг сумын баяр наадамд сумын заан Пүрэвжавын Сандагдорж түрүүлж, Д.Ганбат үзүүрлэв.

Дашинчилэн суманд Батбуян түрүүлж, Булгантамир үзүүрлэсэн.

Орхон суманд сумын начин Лхамсүрэн түрүүлж сумын аан цол, аймгийн заан Сундуйжавын Эрдэнэсайхан үзүүрлэжээ.

Сайхан сумын баяр наадамд сумын начин Буянхишиг түрүүлж цолоо ахиулан, аймгийн начин Бавуусүрэнгийн Мөнхбаяр үзүүр булаав.

Хишиг-Өндөр сумын баяр наадамд залуу бөх Д.Хишигбат түрүүлж, залуу бөх Рэнцэнмядаг үзүүрлэв.

Сэлэнгэ сумын баяр наадамд залуу бөх Д.Булгантөмир түрүүлж, сумын начин Хишигчулуун үзүүрлэжээ.

Могод сумын баяр наадамд сумын заан Өрнөхбаярын Эрдэнэбат дахин түрүүлж, залуу бөх Золбадрах үзүүрлэлээ.

Хутаг-Өндөр сумын баяр наадамд үндэсний бөхийн өсвөр үеийн улсын аваргын зургадугаар байрын шагналт Жамсранжавын Идэрбат түрүүлжээ.

Тэшиг сумын баяр наадамд тойргийн аймгийн заан Д.Мягмардорж түрүүлж, мөн сумын харьяат Алдар СХ-ны бөх сумын заан Бямбаагийн Болорхүү үзүүрлэв.

Баянуур сумын баяр наадамд Говь-Алтай аймгийн Тонхил сумын харьяат Галхүүгийн Мөнгөнбаяр түрүүлж сумын заан цол хүртжээ.

Хөвсгөл

Тосонцэнгэл сумын баяр наадамд шилдэг сумын заан Ц.Сэдбазар долоо даван түрүүлжээ. Сэдбазар хэдхэн хоногийн дараа аймгаасаа начин цол хүртсэн

Их-Уул сумын баяр наадамд өсвөр үеийн улсын аварга шалгаруулах барилдааны дөрөвдүгээр байрын шагналт Энхмэндийн Өлзийсайхан түрүүлж сумын заан цол хүртэв.

Өвөрхангай

Нарийтээл суманд 96 бөх барилдаж сумын начин Найгалсүрэнгийн Загарзүсэм 7 даван түрүүлж сумын заан цол хүртсэн бол, сумын заан Баяртогтохын Мөнх-Өрнөх 6 даван үзүүрлэжээ. Их шөвөгт залуу бөх Жамсранпүрэвийн Мягмарсүрэн үлдэж сумын начин болсон байна.

Сэлэнгэ

Сэлэнгэ аймгийн Алтанбулаг сумын наадам болж Дархан-Уул аймгийн Хонгор сумын харьяат а.а С.Ерөөлт түрүүлж, Сэлэнгэ аймгийн Зүүнбүрэн сумын харьяат а.з Э.Саранбаатар үзүүрлэсэн бол өчигдөр Дархан-Уул аймгийн Шаамар сумын наадам болж Сэлэнгэ аймгийн Мандал сумын харьяат аймгийн арслан Б.Сүхбаатар түрүүлж, Дархан-Уул аймгийн Хонгор сумын харьяат а.а С.Ерөөлт үзүүрлэжээ.

Хөтөл тосгоны наадамд улсын өсөх идэр начин Б.Гончигдамба түрүүлж у.н Ш.Уламбаяр үзүүрлэж у.х Г.Алтангэрэл с.з Ш.Пүрэвгарьд нар шөвгөрчээ.

Улаанбаатар хотын Партизан хорооны наадамд улсын начин Дугардоржийн Батбаяр түрүүлж, аймгийн арслан Э.Ванданцэрэн үзүүрлэв.