Сочигийн олимп энэ сарын 7-нд эхэлнэ

Өвлийн олимпийн 22 дугаар наадам ОХУ-ын Сочи хотноо энэ сарын 7-нд нээлтээ хийнэ. Энэ удаагийн наадамд 88 орны 2500 тамирчин 15 спортын 98 төрөлд өрсөлдөх юм.

2007 оны долдугаар сарын 4-нд Гватемалын Гватемал хотод болсон ОУОХ-ны 119 дүгээр чуулганаар Сочи хотыг сонгосон. Эцсийн даваанд Пёнчангийг Сочи давж олимп зохион байгуулах эрхийг хүртсэн билээ. ОХУ-д Москвагийн олимпийг  эс тооцвол ЗХУ задарснаас хойш анх удаа олимп зохиож байгаа нь энэ.

Нээлт хаалтын ёслол олимпийн «Фишт» цэнгэлдэх хүрээлэнд болох бөгөөд уг хүрээлэн 40 мянган хүний суудалтай. Харин хоккейн  «Большой» мөсөн ордонд шигшээ тоглолтууд зохиогдоно. Тэшүүрийн уралдаан явагдах «Адлер-Арена» төв найман мянган,  уран гулгалт, шорт-трекийн тэмцээн болох "Мөсөн уул" ордон 12 мянга,  кёрлинг тоглох "Мөсөн куб" төв нь гурван мянган хүний суудалтай юм байна.

Энэ олимпод манай улсаас уулын цанын төрөлд Б.Бямбацогт, Ч.Отгонцэцэг гэсэн хоёр тамирчин уралдахаар болсон. Б.Бямбацогт 15 км-т уралдах бол Ч.Отгонцэцэг 10 км-т хурдаа үзнэ.