Монгол тамирчид гадныханд Харри Поттерийг санагдуулжээ

Сочийн Олимпод оролцож буй монгол тамирчдын хувцас багагүй шүүмжлэл дагуулсан. Баг тамирчдын гадуур хувцсыг хүмүүс ШТС-ынхан шиг, уурхайн ажилчид шиг, ТҮК-ийнхан шиг гэцгээсэн. Бүр салбарын сайдыг нь хүртэл энэ асуудлаас болж шүүмжилсэн. Харин монгол тамирчдын хүрэм, өмд зэрэг албаны хослолыг "Гоёо" компани, Францын дизайнер Стефано Ужетти хамтран урласан билээ. Энэ хувцсыг ч манайхан зочид буудлын угтагчийнхтай адил гэсэн. Харин сүүлд Ариунаа Суритай хамтран нэмэлт гоёл зэргийг нь янзалсан гэгдэх манайхны хувцсыг гадныхан онцолжээ.

Тэгэхдээ шүүмжилсэнгүй. "Latinopost.com"-д Монголын тамирчдын хувцас Олимпийн сонирхол татам өмсгөлүүдийн нэг бөгөөд яг л Хогвардсын сурагчдыг санагдуулам гэсэн байв. Тэдэнд нэмэлт аксесуарууд их таалагдсан гэжээ.