Д.Хадбаатар аваргын амьдралын сайн муу бүгдийг харуулсан кино хийнэ

Домогт их аварга Дагвацэрэнгийн Хадбаатарын амьдралын ээдрээ, зөрчил, тэмцэл, нөхөрлөлийн талаар намтарчилсан уран сайхны кино бүтээхээр төсөл хэрэгжүүлж эхлээд байна. Тус киноны найруулагчаар Ж.Сэнгэдорж, Н.Наранбаатар нар ажиллах бол зохиолыг Д.Энхболдбаатар бичиж байгаа аж. Нөгөөтэйгүүр энэ төслийг Өвөрмонгол, Тува, Буриад, Халимагийг уран бүтээлчид хамтран хэрэгжүүлэхээр болжээ. Монгол төрийн наадамд цоллуулж явсан, Монгол төрийн шоронд яллуулж ч явсан домогт, хүчит аварга Дагвацэрэнгийн ХАДБААТАР агсны амьдралын ээдрээ зөрчил, сургамжаар дамжуулан хүн чанар болоод нийгмийн хүрээллийн далд тэмцэл, нөхөр, дайснаа ялган танихын ухаан, цаг үеийн хүлээс хийгээд ялах, ялагдахын учир шалтгааныг кино урлагийн хэлээр дэлгэн харуулахад төслийн зорилго оршиж байгаа аж.