Солилцоо наймааны эргэн тойронд

Месси Челсид?

Челси клуб Испанийн Барселона багийн хагас хамгаалагч Лионель Андрюс Месситэй зургаан жилийн гэрээ байгуулахаар зэхэж байгаа тухай “goal.com” мэдээллээ. “Цэнхэрүүд” каталоны багт 250 сая евро өгч байж Мессиг өөрийн болгох боломжтой аж. Барселонагийн удирдлагууд бүх шийдвэрийг Месси өөрөө гаргана гэв.

 Арсенал Каванигийн төлөө

Лондоны Арсенал шилдэг довтлогч Эдинсон Каваниг Парис Сэйнт Жермейн багаас 75 сая еврогоор худалдан авахаар санаархаж байна. Хэрэв наймаа бүтвэл Арсен Венгерийн бүрэлдэхүүн нэлээд хүчирхэгжих юм. 

Нью Касл Сиссокод шинэ гэрээ бэлдэв

Нью Касл багийн удирдлагууд хагас хамгаалагч Моуса Сиссокод шинэ гэрээ санал болгохоор бэлдэж байна. Учир нь энэ наймааны цонхоор Сиссокод Арсенал, ПСЖ зэрэг багуудаас санал ирээд байгаа юм. 

Скот Синклиар Астон Виллад

Скот Синклиар албан ёсоор Манчестер Ситигээс Астон Виллад шилжлээ. Наймаа 2.5 сая паундад хийгдсэн бөгөөд Синклиар Пол Ламбертын багаас долоо хоногийн 50 мянган паундын цалин авна.

 Юнайтед Де Хеатай гэрээлнэ

Багийнх нь шилдэг хаалгач Де Хеагийн гэрээ дуусахад ердөө 18 сар үлдээд байгаа энэ үед Манчестер Юнайтед түүнд шинэ гэрээ санал болголоо. Де Хеаг Испанийн Реал Мадрид худалдан авахаар санаархаж байгаа тул “Улаан Чөтгөрүүд” амжиж гэрээлэхээр оролдож байна. Хэрэв Юнайтед Де Хеаг үлдээж чадахгүй бол Нью Каслын Крултэй ярилцаж эхлэх аж.

 Хаммелс эргэлзэв

Боруссия Дортмунд багийн шилдэг төвийн хамгаалагч Матс Хаммелс премьер лигийн Манчестер Юнайтед болон Арсеналын аль нэгтэй нь гэрээлж магадгүй болоод байна. Тэрбээр уналтад орсон багаа орхих болсноо хэлээд авсан ч хаашаа явахаа дурьдаагүй юм. Тэгэхээр Юнайтед, Арсенал нарын аль боломжийн санал тавьсанд нь Хаммелс зөвшөөрч болзошгүй.

 Т.Батсугар