Баян-Өлгийд гурилын үнэ “тэнгэрт хадаж” байна

Их халууны улмаас энэ жил Монгол Улс ургацынхаа 80 хувийг алдаж байна. Улстөрчид ингэж хэлэх эрт байна хэмээх зуур энд тэндгүй гурилын үнэ өсч, цаашид ч өсөх, бүр хомсдол дагуулж мэдэх дүр зураг харагдаж байна. Тэр дундаас Баян-Өлгийд гурилын асуудал хурцаар яригдах боллоо. Тус аймгийн  Өлгий сумын бараан зах дээр сүүлийн 10-хан хоногт 50 кг  гурилын үнэ даруй 6000 төгрөгөөр нэмэгдэв. Түүнчлэн ОХУ, Казахстанаас оруулж ирдэг гурил тасалджээ. Тэнд ч мөн ган болж үр тариа ургаагүй бололтой. Мөн хүнсний ногоо, жимс жимсгэнэ ч ОХУ-аас ирдэг байснаа саатаад байна. Ямартай ч Өлгий сумынхан төмс, хүнсний ногоогоо ойролцоох Баяннуур сум болон Ховд аймгаас авч эхэлсэн байна. Тэд мөн импортын гаалийн татвар өндөр учраас хүнсний ногооны үнэ буурдаг цагтаа хямдардаггүй ихэд гомдолтой байдаг аж.