Г.Мандахнаран олимпийн эрхээ авлаа

Чөлөөт, сонгомол бөхийн 2015 оны дэлхийн аварга шалгаруулах тэмцээн АНУ-ын Лас Вегас хотод үргэлжилж байна. Эрэгтэйчүүдийн 65 кг-д гавьяат тамирчин Г.Мандахнаран эхний тойрогт гоц мөргөж, хоёрт Камеруны Б.Йевахыг 9:7, гуравт Венесуэлийн В.Хенрикизийг 10:0-ээр хожсон ба шөвгийн наймд Узбекистаны И.Навризовт 11:1-ээр ялагдаж, дагах барилдаан хийх эрхтэй болсон.

Улмаар дагах барилдаанд Украйны Т.Жахафарианг 13:12-оор ялж, хүрэл медалийн төлөө барилдах эрхтэй болсон. Харин хүрэл медалийн төлөө өнгөрсөн оны дэлхийн аварга ОХУ-ын С.Рамоновтой барилдаж, 6:1-ээр ялагдлаа. Гэсэн ч тэрбээр олимпийн эрхээ өвөртөлж байгаа юм.