“Кубок России по женской борьбе” нээлттэй тэмцээнд манай бөхчүүд оролцоно
ОХУ-ын Чуваш улсын Новочебоксарск хотын “Чебоксары Арена” спортын ордонд энэ оны арван хоёрдугаар сарын 10-12-ны өдрүүдэд Чуваш улсын Тэргүүн М.В.Игнатьевийн нэрэмжит нээлттэй “Кубок России по женской борьбе” олон улсын тэмцээн гурав дахь удаагаа болно.
ОХУ-ынАялал жуулчлал, спортын яам, Чуваш улсын Спортын яам, Оросын спортын бөхийн холбоо хамтран зохион байгуулж байгаа энэ тэмцээний шагналын сан нь 80 мянган ам.доллар юм. Жин тус бүрт түрүүлсэн бөхөд эмэгтэй чөлөөт бөхийн спортыг билэгдсэн, гар хийцийн Цом гардуулж 5 мянга ам.доллараар урамшуулна. Мөнгөн медаль хүртсэн бөхийг 3, хүрэл медаль хүртсэн бөхийг 1 мянган ам.доллараар урамшуулна.
Тус тэмцээнд оросын бөхчүүдээс гадна Азербайжан, АНУ, Беларусь, БНХАУ, Итали, Казахстан, Монгол, Украин зэрэг гадаад орны бөхчүүд оролцохоор мэдүүлгээ өгсөн байна.
Урьдчилсан, тэгшитгэлийн болон дагах барилдаанууд тэмцээний эхний өдөр болно, хоёр дахь өдрийн үдээс өмнө хүрэл медалийн төлөөх, үдээс хойш алтан медалийн төлөөх барилдаанууд болно.
Тэмцээнийг концерт-спортын шоу байдлаар зохион байгуулж барилдааны дундуур чувашийн урлагийн одууд, эстрадын нэрт хамтлагууд ая дууны дээжээ толилуулах юм байна.
Энэ тэмцээнд манай улсаас “Алдар” клубын дасгалжуулагч, Гавьяат дасгалжуулагч Ц.Хосбаярын удирдлага дор Гавьяат тамирчин Ц.Энхжаргал /48 кг, “Алдар” спорт хороо/, спортын дэд мастер Бат-Оршихын Болор-Эрдэнэ /53 кг, “Алдар” спорт хороо/, олон улсын хэмжээний мастер Ганбаатарын Отгонжаргал /53 кг, “Алдар” спорт хороо/, олон улсын хэмжээний мастер Алтанцэцэгийн Батцэцэг /55 кг, "Алдар" спорт хороо/, спортын мастер Энхсайханы Дэлгэрмаа /60 кг, “Дархан-Хасу-Мегастарс” клуб/, спортын мастер Пүрэвхүүгийн Шинэхүү /55 кг, ”Алдар” спорт хороо/, Гавьяат тамирчин Цэрэнчимэд /58 кг, “Алдар” спорт хороо/, олон улсын хэмжээний мастер Пүрэвдоржийн Орхон, Энхбаярын Цэвэгмид /63 кг, ”Алдар” спорт хороо/, олон улсын хэмжээний мастер Бадрахын Одончимэг /75 кг, “Алдар” спорт хороо/ нар оролцоно. Олон улсын шүүгч Г.Амархүү шүүгчээр оролцоно.
Өнгөрсөн оны тэмцээнээс 58 кг-ын жинд П.Орхон алт, 53 кг-ын жинд Д.Отгонцэцэг, 63 кг-ын жинд С.Батцэцэг нар мөнгө, 58 кг-ын жинд А.Батцэцэг, Б.Шоовдор нар хүрэл медаль авч байжээ.
Холбоотой мэдээ
Сэтгэгдэл ( 0 )