О.Насанбурмаа мөнгө, Э.Гантуяа, Ш.Түмэнцэцэг нар хүрэл медаль хүртлээ

ОЛИМПИЙН ХОШОЙ АВАРГА, ДЭЛХИЙН АВАРГА И.ЯРЫГИНИЙ НЭРЭМЖИТ “АЛТАН ГРАН-ПРИ” УЛАМЖЛАЛТ ОЛОН УЛСЫН ТЭМЦЭЭНИЙ ЭХНИЙ ӨДРИЙН ДҮН ГАРЛАА.

58 кг-ын жинд Э.Гантуяа нэгдүгээр тойрогт С.Цэрэнчимэдийг 9:7, хоёрдугаар тойрогт оросын бөх Ходижат Муртазалиеваг 10:0 онооны харьцаагаар ялж хагас шигшээ барилдаанд киргизийн бөх Айсулуу Туныбековад цэвэр ялагдаж хүрэл медалийн төлөө оросын бөх Мария Матушенког 7:0 хожжээ. Э.Гантуяа нь киргизийн бөхөд өнгөрсөн жилийн азийн аварга шалгаруулах тэмцээнд ялагдаж байсан бол П.Орхон олимпийн сонгон шагаруулах тэмцээнд алтан медалийн төлөө барилдаанд хожигдож байсан юм.

60 кг-ын жинд З.Болортунгалаг хоёрдугаар тойрогт О.Оюунтуяаг 7:4 онооны харьцаагаар хожиж гуравдугаар тойрогт оросын бөх Динара Соликоваг цэвэр дарж хагас шигшээ барилдаанд оросын бөх Юлия Пронцевичид 0:7 онооны харьцаагаар ялагдаж хүрэл медалийн төлөө АНУ-ын бөх Элисссон Маркензи Рагантай барилдаж цэвэр ялагджээ.

Б.Шоовдор хоёрдугаар тойрогт оросын бөх Светлана Липатоваг 6:2 онооны харьцаагаар ялж гуравдугаар тойрогт японы бөх Кацуки Сакагамид 0:10 онооны харьцаагаар ялагдаж дагах барилдаанд оросын бөх Назира Аманзоловаг 5:0 онооны харьцаагаар хожиж хүрэл медалийн төлөө барилдаанд оросын бөх Жаргалма Цыреновад 0:5 онооны харьцаагаар дийлджээ. Б.Шоовдор нь оролцсон тэмцээн бүрээсээ медаль хүртдэг уламжлалаа энэ удаа тасалдуулав.

69 кг-ын жинд О.Насанбурмаа нэгдүгээр тойрогт оросын бөх Юлия Максимоваг 6:0, хосрдугаар тойрогт Ш.Түмэнцэгийг 8:3 онооны харьцаагаар ялж хагас шигшээ барилдаанд оросын бөх Ксения Бураковаг цэвэр ялж алтан медалийн төлөө барилдаанд АНУ-ын Тамира Менсахтай барилдаж 4:8 онооны харьцаагаар хожигдож мөнгөн медаль дээр буужээ. Ийнхүү О.Насанбурмаа нь энэ тэмцээний хошой мөнгө, алт, хүрэл медальт бөх болов.

Ш.Түмэнцэцэг нэгдүгээр тойрогт оросын бөх Анастасия Братчиковаг цэвэр ялж хоёрдугаар тойрогт О.Насанбурмаад 3:8 онооны харьцаагаар хожигдож дагах барилдаанд Юлия Максимоваг 10:0 онооны харьцаагаар буулган авч хүрэл медалийн төлөө барилдаанд оросын бөх Ксения Бураковаг 12:5 онооны харьцаагаар өвдөг сөхрүүлж энэ тэмцээнээс 3 дахь хүрэл медалиа авлаа.

57 кг-ын жинд бөх өрсөлдөгчөө илүүрхэн ялж алиан медаль хүртсэн “дагестаны машин” гэж нэрлэгдсэн 21 настай бөх Заур Угуевийг энэ тэмцээний нээлт гэж үзсэн байна.

Тэмцээний эхний өдрийн дүн

Эрэгтэй чөлөөт бөх

57 кг               1. Заур Угуев /ОХУ, залуучуудын дэлхийн аварга/

                        2. Артём Гебеков /ОХУ/

                        3. Нариман Испарилов /ОХУ, европийн аварга/

                        3. Зелимхан Абакаров /ОХУ/

74 кг               1. Ахмед Гаджимагомедов /ОХУ/

                        2. Ацамаз Санакоев /ОХУ/

3. Радик Валиев /ОХУ/

3. Кахабер Хубежты /ОХУ/

Эмэгтэй чөлөөт бөх

48 кг               1. Юу Сусаки /Япон/

                        2. Дарья Лексина /ОХУ/

                        3. Милана Дадашева /ОХУ/

                        3. Миглена Селишка /Болгар/

58 кг               1. Айсулуу Туныбекова /Киргиз, азийн аварга/

                        2. Вероника Чумикова /ОХУ/

                        3. Энхбатын Гантуяа /“Хилчин” спорт хороо, азийн аварга

                            шалгаруулах тэмцээний хүрэл медальт /

                        3. Акиа Ханая /Япон/

60 кг               1. Кацуки Сакагами /Япон/

                        2. Юлия Пронцевич  /ОХУ, европийн аварга шалгаруулах

                           тэмцээний хүрэл медальт/

                        3. Жаргалма Цыренова /ОХУ, европийн аварга шалгаруулах

                           тэмцээний мөнгөн медальт/

                        3. Элиссон Раган /АНУ, ДАШТ-ний мөнгөн медальт /

69 кг               1. Тамира Менсах /АНУ/

                        2. Очирбатын Насанбурмаа /“Алтай констракш”   

                            компани, ДАШТ-ний 3 хүрэл медальт, азийн аварга/

            3. Элис Маналова /Азербайжан/

3. Шархүүгийн Түмэнцэцэг /“Хилчин” спорт хороо, азийн

    аварга шалгаруулах тэмцээний мөнгөн медальт/

Өнөөдөр эрэгтэй 61, 86, 125 кг, эмэгтэй 53, 55, 63, 75 кг-ын жингүүдийн барилдаан болно.

Эмэгтэй 53 кг-ын жинд нэгдүгээр тойрогт Г.Отгонжаргал Н.Лхагвадуламтай, Э.Сумьяа Б.Хатантуултай, Д.Отгонцэцэг оросын бөх Наталья Малышеватай, Б.Болор-Эрдэнэ оросын бөх Оршуш Стальвиратай, 55 кг-ын жинд нэгдүгээр тойрогт А.Батцэцэг хийлж Э.Даваачимэг П.Шинэхүүтэй, 63 кг-ын жинд П.Орхон оросын бөх Анна Щербаковатай, Э.Цэвэгмид оросын бөх Анжелика Фоменкотай, Э.Дэлгэрмаа казахстаны бөх Зорина Кунанбараеватай, 75 кг-ын жинд Ц.Баярзаяа казахстаны бөх Ирина Казулинатай, Г.Уртнасан оросын бөх Дарья Шистероватай сугала таарчээ.

П.Орхон нэгдүгээр тойрогт ялсан тохиолдолд хоёрдугаар тойрогт европийн спортын наадмын аварга Валерия Лазинскаятай таарах магадлал байна.

Эрэгтэй 61 кг-ын жинд Б.Нэмэхбаяр оросын бөх Андрей Бекреневтэй, 86 кг-ын жинд нэгдүгээр тойрогт П.Өнөрбат хийлж Б.Нямбаяр ираны бөх Мухаммадджавад Эбрахимитэй, 125 кг-ын жинд Н.Золбоо оросын бөх Балдан Цыжиповтой, М.Лхагвагэрэл оросын бөх Казбек Хабеловтой оноолт таарчээ.