Оросын баячууд хөлбөмбөгийн клуб худалдан авсаар байна

Оросын бизнесмэн Дмитрий Рыболовлев Францын Monaco Sport Invest компанийн хяналтын багцыг худалдаж авчээ. Ингэснээр тэрбээр хөлбөмбөгийн “Монако” багийн хувьцааны 66.67 хувийг эзэмших болсон байна. Франс пресс агентлаг энэ талаар мэдээллээ. Оросын олигархи гэрээ ёсоор ирэх дөрвөн жилийн дотор 100 сая еврогийн хөрөнгө оруулалтыг багтаа хийх юм байна. Гэхдээ зайлшгүй шаардлага гарсан тохиолдолд энэ хэмжээ өсч болох гэнэ. Багийн захирлуудын зөвлөлийг Д.Рыболовлев өөрөө тэргүүлэх аж. Захирлуудын зөвлөлд түүнээс гадна Monaco Sport Invest компанийн тав, Монакогийн вант улсын гурван төлөөлөгч багтаж байгаа юм.

            “Монако” баг нь үүсгэн байгуулагдсанаасаа хойш Францын аваргаар долоо, цомын аваргаар таван удаа шалгарч байжээ. Өнө эртний арвин түүхтэй энэ баг 2011-2012 оны улиралд Францын хоёрдугаар дивизионд тоглож байгаа бөгөөд хүснэгтийн сүүлийн байрт бичигдэж байгаа юм.   

Д.Рыболовлевын хувьд, ОХУ-ын хамгийн баян хүмүүсийн нэгд тооцогддог юм байна. Тэрбээр 1996 оноос “Уралкалия” компанийн хяналтын багцыг эзэмших болж, 2010 онд үүнийгээ өндөр үнээр худалдсан юм. Дэлхийн хөрөнгөтнүүдийн жагсаалтыг гаргадаг “Форбес” сэтгүүл түүнийг 9,5 тэрбум ам.долларын хөрөнгөтэй гэж үзэн дэлхийн 96 дугаар баян хүнд тооцжээ. 

С.Төгөлдөр