Хаана, хэзээ ямар наадмууд болох вэ?

Ерөнхийлөгчийн сонгуультай холбоотойгоор аймгуудын энэ жилийн баяр наадам хойшилсон. Тиймээс энэ өдрүүдэд наадам үргэлжилсээр байна.

Тэгвэл хамгийн ойрын наадам маргааш болох нь ээ. Энэ жил Баянхонгор аймгийн 60 жилийн ой тохиож буй. Тиймээс наадмаа хамтатган 21, 22-нд зохион байгуулахаар товложээ.

Хаана, ямар наадам товлогдсоныг хүргэе.

Архангай: Тус аймгийн Булган сумын харьяат, хүчит арслан Д.Мөнх-Эрдэнэд хүндэтгэл үзүүлэх наадам энэ сарын 28, 29-нд болно. Наадамд улс, аймгийн алдар цолтой 256 бөх барилдаж, гурван насны морь уралдуулах юм.

Говьсүмбэр: Баянтал сумын наадам энэ сарын 27-нд болох бол Шивээговь сумынх 30-нд товлогджээ.

Дорноговь: Ноён хутагт Данзанравжаагийн нутгийн зон олон энэ сарын 28, 29-нд наадна.

Завхан: “Нүүдэлчдийн соёлын наадам” энэ сарын 22-25-нд Эрдэнэхайрхан сумын “Улаагчны хар нуур”-ын эрэг дээр болно.

Дундговь: Тулгар төрийн 2226, Их Монгол Улсын 811, Ардын хувьсгалын 96 жил, Дундговь аймгийн 76 жилийн баяр наадам энэ сарын 28-нд товлогджээ. Энэ өдөр Их номч Бандида Зава Дамдины мэлмий гийсний 150 жилийн ой “Алтан дэвтэр даншиг”,  “Их мандал” говийн бүсийн хурдан морины уралдаан, “Нарны хүлэг” уяачдын холбооны 20 жилийн ой мөн өдөр болно.

Өвөрхангай: Өвөрхангай аймгийн төв Арвайхээр сум байгуулагдсаны 290 жилийн ой, Төвийн бүсийн даншиг наадам, “Арвай хээр” холбоо байгуулагдсаны 10 жилийн ойн баяр наадам энэ сарын 28-30-ны өдрүүдэд болох аж.

Сүхбаатар: Тус аймгийн наадам энэ сарын 28, 29-нд “Зүүн бүсийн хурд”-тай хамт болохоор товлогджээ.

Сэлэнгэ: Өнөөдөр эхэлсэн Жавхлант сумын наадам энэ сарын 22-нд өндөрлөнө. Харин Сүхбаатар сумынх 28, 29, 30-нд болох юм.

Хөвсгөл: Энэ жилийн улсын их баяр наадамд Ц.Содномдорж түрүүлж арслан цол хүртсэн. Түүний цолны мялаалга Тосонцэнгэл сумнаа энэ сарын 27-нд болно. Мялаалгын барилдаанд түрүүлсэн бөхийг 15 сая төгрөгөөр байлах аж.

Д.Тамир

WWW.ZINDAA.MN