”ДЭЛХИЙН АВАРГА”-тай өглөөний мэнд
П.ОРХОН ЧӨЛӨӨТ БӨХИЙН ТАВ ДАХЬ ДЭЛХИЙН АВАРГА ТАМИРЧИН БОЛЛОО
Чөлөөт бөхийн эмэгтэйчүүдийн тэмцээн өчигдөр /2017.08.23/ Парис хотын “Accor Hotels Arena”-д эхэлсэн.
Тус тэмцээний эхний өдөр Азийн АШТ-ий мөнгө, залуучуудын ДАШТ-ий хүрэл, цэргийн ДАШТ-ий мөнгөн медальт, Иван Ярыгиний нэрэмжит “Алтан Гранпри”-гийн хошой аварга, Бакугийн “Алтан Гранпри”-гийн мөнгө, Парисийн “Алтан Гранпри”-гийн хүрэл, Испанийн Гранпригийн алт, Польшийн нээлттэй тэмцээний хошой аварга, “Mongolia Open” ОУТ-ий гурван удаагийн аварга, Монгол Улсын хошой аварга, Үндэсний шигшээ баг, “Алдар” спорт хороо, “Аваргууд” академийн тамирчин ОУХМ Пүрэвдоржийн Орхон Монголын чөлөөт бөхийн тамирчдаас ДАШТ-ээс долоо дахь алтан медалийг авчирч, эх орон, элэг нэгтнүүдээ баярлуулсан сайхан үйл явдал боллоо.
Тэрбээр Парисын дэвжээнд эхлээд 2012 оны ДАШТ-ий тавдугаар байрын шагналт Энэтхэгийн Шилпи Шераныг оноогоор цэвэр яллаа. “Москва-2010” ДАШТ-ий хүрэл медальт, 2012 оны Европын аварга Шведийн Хенна Йоханссоныг 6:2-оор, 1/4 шигшээд Африк тивийн долоон удаагийн аварга Нигерийн Блессинг Оборудудуг цэвэр, хагас шигшээд “Бээжин-2008”, “Лондон-2012” олимпийн наадмын хүрэл медальт, Пан Америкийн наадмын алт, хүрэл медальт, Пан Америкийн дөрвөн удаагийн аварга Колумбийн Жаклин Рентериа Кастильог оноогоор цэвэр (13:0), алтан медалийн төлөөх барилдаанд ДАШТ-ий алт, хүрэл медальт, Европын хошой аварга Украины Юлья Ткачийг 6:3-аар тус тус ялснаар Монгол Улсын алтан соёмбот далбаагаа Парисын тэнгэрт мандуулав.
Өдгөө 24 настай П.Орхон чөлөөт бөхийн дэлхийн аварга болсон Монгол Улсын тав дахь тамирчин болсон юм. Түүнээс өмнө хөдөлмөрийн баатар Зэвэгийн Ойдов “Стамбул-1974, Минск-1975”, Хорлоогийн Баянмөнх “Минск-1975”, Соронзонболдын Батцэцэг “Москва-2010”, “Лас Вегас-2015”, гавьяат тамирчин Сүхээгийн Цэрэнчимэд “Ташкент-2014”-д дэлхийн аварга хэмээх эрхэм алдрыг хүртэж байв.
Өчигдөр /2017.08.23/ барилдсан манай бусад бүсгүйчүүдээс 55 кг-д “Хилчин” спорт хорооны тамирчин ОУХМ Эрхэмбаярын Даваачимэг найм, 58 кг-д “Хасу-Мегастарс” клубийн тамирчин ОУХМ Алтанцэцэгийн Батцэцэг 12, 75 кг-д “Хилчин” спорт хорооны тамирчин ОУХМ Ган-Очирын Уртнасан наймдугаар байр эзэллээ. Эхний өдөр 55 кг-д алдарт Саори Ёшидагийн залгамжлагч гэгдээд буй Японы 18 настай охин Харүна Окүно, 58 кг-д “Рио-2016” олимпийн наадмын аварга, ДАШТ-ий алт, мөнгө, хүрэл медальт АНУ-ын алдарт бөх Хелен Марулис, 75 кг-д энэ жилийн Европын аварга Туркийн Ясемин Адар нар түрүүлэв.
ЭМЭГТЭЙЧҮҮДИЙН ЭХНИЙ ӨДРИЙН ДҮН:
55 кг (24 бөх): 1. Харүна Окүно (Япон) 2. Одуня Адекурой (Нигери) 3. Бека Литерс (АНУ), Ирина Курашкина (Беларусь)
58 кг (27): 1. Хелен Марулис (АНУ) 2. Марва Амри (Тунис) 3. Мишель Фаззари (Канад), Айсулуу Тыныбекова (Киргизстан)
63 кг (23): 1. Пүрэвдоржийн Орхон (Монгол) 2. Юлия Ткач (Украин) 3. Жаклин Рентериа Кастильог (Колумб), Валерия Лазинская (ОХУ)
75 кг (23): 1. Ясемин Адар (Турк) 2. Василиса Марзалюк (Беларусь) 3. Хироэ Сүзүки (Япон), Жюстина Ди Стасио (Канад)
МОНГОЛЫН ЧӨЛӨӨТ БӨХИЙН ХОЛБОО
Холбоотой мэдээ
Сэтгэгдэл ( 3 )
ТЭЦ4-ийн замын урд агуулах оффистой 1га аж ахуйн газар зарна. 88145555
13-р хороололд зам дагуу ямар ч баилга барьж болох 350м2 өмчлөгдсөнгазар зарна. 88145555
Хотод ойр, ойн захад хотхон барихад тохиромжтой тог усаа шийдсэн, зам сайтай 10га газар зарна. 88145555