Н.Золбоо Таха Акгулийн аманд очлоо

“Парис-2017” ДАШТ-ий чөлөөт бөхийн эмэгтэйчүүдийн тэмцээн өнөөдөр өндөрлөж, маргаашнаас эрчүүдийн өрсөлдөөн эхэлнэ. Маргааш Монгол Улсын гавьяат тамирчин Э.Бэхбаяр 57 кг-д, ОУХМ Т.Түвшинтулга 61 кг-д, О.Үйтүмэн 86 кг-д, Н.Золбоо 125 кг-д тус тус хүч үзэх бөгөөд манай бөхчүүд хэрхэн сугалаа татсаныг хүргэе. 

57 кг: Үндэсний шигшээ баг, “Алтай” констракшн, “Хангарьд” спорт хорооны тамирчин гавьяат тамирчин Эрдэнэбатын Бэхбаяр эхний тойрогт Киргизстаны Улукбек Жолдошбековтой хүч үзэхээр боллоо. Түүнийг ялбал ДАШТ-ий мөнгөн медальт Гүржийн Бека Ломтадзе, залуучуудын дэлхийн аварга Туркийн Сулейман Атли нарын ялсантай барилдана. Энэ хэсэгт ОХУ-ын Заур Угуев, Японы Юүки Такахаши, Энэтхэгийн Сандееп Томар гээд бараг бүх шилдгүүд “чихэлджээ”. Эднээс нэг нь хэсгээсээ торойно гэж бодохоор бидний хэлдгээр нэлээд “халуухан” юм болох нь ээ. 

61 кг: “Аваргууд” академийн тамирчин ОУХМ Түмэнбилэгийн Түвшинтулга эхний тойрогт Беларусийн Хусейн Шахбановтой барилдана. Түүнийг ялбал олимп, дэлхийн аварга Гүржийн Владимир Хинчегашвили хүлээж байна. Тэдний зоонд нь өнгөрсөн жилийн Логан Стейбер, энэ жилийн Оросын аварга Гажимурад Рашидов, Европын гурван удаагийн аварга тува гаралтай турк эр Чингисхан Эрдоган нарын гол өрсөлдөгчид багтжээ.
 

86 кг: “Алдар” спорт хороо, “Аваргууд” академийн тамирчин ОУХМ Оргодолын Үйтүмэн эхний тойрогт Украины Любомир Сагалюктай тэгшитгэлд оноолт таарчээ. Түүнийг ялбал Унгарын Иштван Вереб хүлээж байна. Энэ жингийн шилдгүүд болох олимпийн аварга Ираны Хассан Яздани, олимп, дэлхийн дэд аварга Туркийн Селим Яшар, Пуэрто-Рикогийн Жейми Эспанол, энэ жилийн Оросын аварга Владислав Валиев, Азербайжаны Александр Гостиев нарын шилдгүүд түүний дээд хэсэгт бөөндөө багтжээ. 
 

125 кг: Үндэсний шигшээ баг, “Хүч” спорт хорооны тамирчин ОУХМ Нацагсүрэнгийн Золбоо эхний даваанд “Рио-2016” олимпийн наадам, Дэлхийн хошой, Европын таван удаагийн аварга Туркийн Таха Акгультай барилдахаар боллоо. Н.Золбоо нэг номерийг сугалсанаар энэ жингийн тэргүүн бөх турк эрийн аманд очив.

МОНГОЛЫН ЧӨЛӨӨТ БӨХИЙН ХОЛБОО