Н.Түвшинбаяр Дэлхийн аварга шалгаруулах тэмцээнээс хүрэл медаль хүртлээ

“Будапешт-2017" жүдо бөхийн ДАШТ-ий хүнд жингийн барилдаанууд энэ сарын 2-ны өдрөөс гурванд шилжих шөнө болж өндөрлөлөө. Унгарын нийслэлд болж буй тус тэмцээний +100 кг-ын жинд Хөдөлмөрийн баатар Найдангийн Түвшинбаяр эхний тойрогт Казахстаны Ержан Шинкеевийг ялсан. Тэрээр  хоёрдугаар тойрогт олимпийн мөнгөн медальт Японы Х.Харасаваг ялсан Австрийн Стефан Хегитэй хүч үзэж, үүрэх мэхээр вазари үнэлгээ аван хожлын оноог авав.

Харин А хэсгийн аваргын төлөө дэлхийн чансааг тэргүүлэгч Бразилийн Давид Моуратай барилдаж ялагдал хүлээсэн. Улмаар  хүрэл медалийн төлөөх барилдаанд Европ тивийн аварга, Бакугийн “Их дуулга”-ын аварга, Гүржийн бөх Гурам Тушишвилиг цэвэр дарж, ялалт байгууллаа. Ийнхүү Хөдөлмөрийн баатар, МУГТ Олимпын алт, мөнгөн медальт Найдангийн Түвшинбаярын цол гуншин Дэлхийн аваргын хүрэл медальт гэдэг эрхэм алдраар хаяагаа тэллээ. Түүний дэлхийн дэвжээнд гаргасан амжилтыг дурдвал:

2006 - Дэлхийн Оюутны аваргын хүрэл
2007 - Парисын дэлхийн цомын хүрэл
2007 - Гамбургийн дэлхийн цомын хүрэл
2007 - Ази тивийн аваргын мөнгө
2007- Чиндаогийн нээлттэй тэмцээний хүрэл
2008 - Парисын дэлхийн цомын мөнгө
2008 - Ази тивийн аваргын хүрэл
2008 - Бээжин-2008 олимпийн алт
2010 - Чингис хаан дэлхийн цомын алт
2010 - Монгол Улсын аваргын алт
2011 - Монгол Улсын аваргын алт
2011 - Будапештийн дэлхийн цомын алт
2011 - Жежүгийн дэлхийн цомын алт
2011 - Парисын Их дуулгын мөнгө
2011 - Абу Дабигийн гран пригийн хүрэл
2011 - Ази тивийн аваргын хүрэл
2012 - Парисын Их дуулгын алт
2012 - Лондон-2012 олимпийн мөнгө
2013 - Токиогийн Их дуулгын хүрэл
2013 - Жежүгийн Гран пригийн алт
2014 - Дюсселдорфын Гран пригийн хүрэл
2014 - Жежүгийн Гран пригийн мөнгө
2014 - Инчеоны Азийн наадмын алт
2015 - Чиндаогийн Гран пригийн алт
2016 - Ази тивийн аваргын алт
2017 - Монгол Улсын аваргын алт
2017 - Дэлхийн аваргын хүрэл... медаль хүртээд байна.

Л.Ганзул  

www.zindaa.mn