Баян-Өлгийнхөн Д.Намнан баатрын хөшөөг хүндэтгэв

Баян-Өлгий аймгийн хилийн цэргийн 0165 дугаар анги Монгол Улсын баатар Дамдины Намнанд зориулж хөшөө босгосон байна. Энэ сарын 17-нд  Хил хамгаалах байгууллага үүсч хөгжсөний 84 жилийн ойн баяр тохиох үеэр тус хөшөөний нээлтийг ёслолыг хүндэтгэлтэйгээр зохион байгуулжээ.

Нээлтийн ажиллагаанд аймгийн ИТХ-ын дарга Д.Бауыржан, аймгийн Засаг дарга бөгөөд Хил хамгаалах туслах хүчний зөвлөлийн дарга А.Гылымхан, ангийн захирагч хурандаа Б.Мөнхбат болон тус байгууллагад ажиллаж байсан үе үеийн ахмад хилчид, ажилчид оролцлоо.

  Монгол улсын баатар Д.Намнан 1919 онд Ховд амйгийн дарви суманд төрсөн гэдэг. 
Тэрбээр 1943 оны 7 сарын 30-нд Шарговийн бага даваанд түрүүч Хорлоогийн Дамба, байлдагч Сундуйжавын Балжир, Рандалын Лувсанпүрэв нарыг удирдан хилийн манааны үүрэг гүйцэтгэж байхад нь хятадын 100 гаруй дээрэмчин манай хилийн манааг устган, амьд хэл олзлохоор бүслэн дайрчээ. Манаа Даяннуурын сумангаас гарсан ба хилээс 154 км, салбараасаа 30 км зайтай үүрэг гүйцэтгэж байж. Н.Балжирыг холбоо бариулахаар томилсон боловч морь руугаа мөлхөж яваад алагдсан тул хоёул үлдэн эрэлхэгээр байлдсаар амь үрэгдсэн байна .

 Түүний байгуулсан баатарлаг гавьяаг нь үнэлэн Ардын Их Хурлын Тэргүүлэгчдийн  1983 оны 135 тоот тогтоолоор  "Монгол Улсын Баатар" цолыг нэхэн олгосон байна.

Мөн 2015 онд Баян-Өлгий аймгийн Иргэдийн Төлөөлөгчдийн Хурлын шийдвэрээр Цэргийн гавьяаны Улаан тугийн одонт хилийн 0165 дугаар ангийг түүний нэрэмжит болгосон аж. 

Л.Зул

www.zindaa.mn