Гундаж буй сарнай буюу Деррик Рөүз

Үндэсний сагсан бөмбөгийн холбооны Чикаго Буллс багийн холбон тоглогч Дерик Мартел Рөүз 1988 оны 10-р сарын 4-нд АНУ-ын Иллинойс мужийн Чикаго хотод Бренда Рөүзийн дөрөв дэх хүү болон мэндэлсэн бөгөөд гурван ахыг нь Двейн Рөүз, Аллен Рөүз, Рэгги Рөүз гэдэг аж.

            Деррик Рөүзийн аав Америк, Азийн эрлийз аж. Рөүз Чикаго хотын өмнөд хэсэгт байрлах хамгийн аюултай газрын нэгт тооцогддог Инглвүүд-д өссөн. Түүний яг дээд талын ах нь түүнээс долоон насаар ах. Гурван ах нь бүгд сагс сайн тоглодог байсан болохоор түүнд багаас нь сагс яаж тоглохыг зааж өгсөн гэдэг. Түүнийг эмээ нь өсгөж, багад нь өхөөрдөн Пүүх гэж дууддаг байжээ. Түүний зүүн мөрөн дээр нь POOHDINI гэсэн шивээс байдаг.

                        2003 онд тэрээр сайн тоглолтыг үзүүлж олон ахлах сургуулийн анхаарлыг татсан ба Торнвүүд ахлах сургуулийг сонгож “Волвирнес” багт хүчин зүтгэж эхлэв. Тэрээр 1984 онд дээрэмчдэд буудуулж амиа алдсан ахмад тамирчин Бен Бенжи Вилсоны 25 дугаарыг сонгожээ. Гэвч сургуулийн ерөнхий дасгалжуулагч Боб Хамбрик эхний жилдээ тоглож буй тоглогчийг шигшээд тоглуулахгүй гэж татгалзсан байна. Энэхүү бичигдээгүй дүрэм энэ сургуульд 1980 оноос хойш үйлчилж байлаа. Гэвч Рөүз эхний жил 18.5 оноо, 6.6 оновчтой дамжуулалт, 4.7 самбараас бөмбөг авалт,  2.1 бөмбөг таслалт дунджилж дасгалжуулагчийнхаа бодлыг өөрчилж чаджээ. Тэрээр Рөүзийг мужийн шигшээ тоглолтонд оролцохыг зөвшөөрсөн боловч бусад тоглогчид боломж олгох үүднээс татгалзсан. Дараагийн жил нь Хамбрик тэтгэвэртээ гарч, Роберт Смит шинэ дасгалжуулагчаар сонгогдсон. Тэр жил Рөүзийн шилдэг тоглолтыг үзэхийн тулд коллежийн багийн менежер скаутууд билетийг нь худалдан авч, олон удаа билет нь дуусч байсан гэдэг. “Волвирнес” баг 30-5 гэсэн амжилт үзүүлэхэд түүний дунджилсан 19.8 оноо, 5.1 самбараас бөмбөг авалт, 8.3 оновчтой дамжуулалт, 2.4 бөмбөг таслалт голлох үүрэг гүйцэтгэсэн. “Парад” сэтгүүл түүнд анхных нь шагналыг өгч, тэр нь бүх Америкийн багийн спортын шилдэг тоглогчдын нэг гэдгийг онцолсон хэрэг байлаа. Ахлах сургуулийн гурав дахь жил буюу 2006 онд “Волвирнес” баг “Юнайтед центр”-т болсон “Чикаго паблик” лигт түрүүлснээр мужийн аварга шалгаруулах тэмцээнд оролцох эрхтэй болсон.

Ричвүүд ахлах сургуулийн эсрэг тоглосон тоглолтонд  дөрөв дэх үеийн төгсгөлд эсрэг баг баззер шот хийн нэмэлт цаг сунгахаар болжээ. Нэмэлт цаг дуусахад хэдхэн секундын өмнө Рөүз бөмбөг таслан үсрэлттэй шидэлтээр багтаа 1984 оноос хойшхи анхны аварга цолыг нь авчрах шидэлтийг амжилттай болгов. Энэ улирлын дараагаар бүх америкийн хоёрдугаар багт сонгогдсон, мөн “Парад” сэтгүүлийн Бүх америкийн багийн спортын шилдэг тамирчдын нэгээр дахин нэрлэгдсэн юм. Улмаар ахлах сургуульд байхдаа хоёр удаа мужийн аварга болж, эргэлзээгүйгээр ахлах сургуулийн хамгийн шилдэг холбон тоглогч болсон юм.

Индианагийн их сургууль болон Иллонойсын их сургуулиуд түүнийг ихээр сонирхож байсан хэдий ч тэрээр Мемфисийн их сургуульд элсэн орохоор шийджээ.  Тус сургуулийн “Мемфис Тайгерс” баг Пенни Хардидэй-н 25 дугаарыг мөнхөлсөн байсан тул өөрийн хувийн дагаарыг 23 болгож өөрчлөв. Түүний баг эхний 26 тоглолтонд ганц ч хожигдоогүй. Улмаар улирлыг 33-1 гэсэн амжилтаар өндөрлөхөд Рөүз  14.9 оноо, 4.7 дамжуулалт, 4.5 самбар дунджилсан. Тэрээр Боб Коуси-н нэрэмжит шагнал болон Жон Р.Вүүдений нэрэмжит шагналын эзэн болов. “Мемфис Тайгерс” баг дивизоноо тэргүүлж шилдэг дөрвөн багийн нэг болсон ч хагас шигшээд Канзасын их сургуульд хожигджээ.

Ингээд NBA-д орсон эхний жилдээ 47.5 хувьтай довтолж, 16.8 оноо 6.3 оновчтой дамжуулалт, 3.9  самбараас бөмбөг авалт дунджилснаар шилдэг шинэ тоглогчдын нэгдүгээр багт нэрлэгдсэн. Плей оффын тоглолтонд “Селтикс”-ыг нэмэлт цагт 105:103-аар хожсон тоглолтонд 36 оноо авснаар 1970 оны Плей оффт Карийм Абдул Жабар эхний тоглосон жилдээ авсан оноотой нь тэнцсэн аж. Бүх цаг үеийн Плей оффын түүхэнд 35 оноо, 10 оновчтой дамжуулалт өгсөн хоёр дахь тоглогч болсон байна. Нөгөө нь мэдээж Крис Пол билээ. “Чикаго Буллс” хэдийгээр “Селтикс”-т хожигдсон боловч Рөүз долоон тоглолтонд 47 хувьтай довтолж 19.7 оноо, 6,3 оновчтой дамжуулалт, 4,9 самбараас бөмбөг авалт дунджилсан.

Тэрээр дараа жил шагайны гэмтлийн улмаас улирлын өмнөх тоглолтонд оролцоогүй. Жинхэнэ улирал эхлэхэд тоглолтонд оролцож гараанд гарч байсан хэдий ч бэртлээсээ болж цөөхөн минутыг талбай дээр өнгөрүүлж байлаа. Харин дараа сараас түүний шагай эдгэж өөрийн үндсэн тоглолтоо эргүүлэн авчирсан. Улмаар түүнийг бүх оддын тоглолтонд оролцуулахаар сонгосон байна. Энэ нь мөн л 1998 онд Жордан бүх оддын тоглолтонд орсноос хойшхи “Чикаго Буллс” багийн анхны тоглогч болсон. Тус улиралд баг нь улирлыг 41-41 гэсэн амжилттайгаар өндөрлөж, Плей оффын эхний шатанд Кливлендтэй таарсан ч 4:1-ээр хожигдсон байна. Рөүз хоёр дахь Плей оффын цувралдаа 26.8 оноо 7.2 оновчтой дамжуулалт дунджилж, 2010 оны 1 сард ESPN-ийн мэдээлсэнээр Рөүзийн өмсгөл  хамгийн борлуулалттай өмсгөлүүдийн дөрөвт жагссан байна.

Дараагийн улирал “Чикаго Буллс” баг улирлыг 62:20 гэсэн амжилтаар өндөрлөж, зүүн бүсийг тэргүүлжээ. “Чикаго Буллс” хамгийн сүүлд 1998 онд 60-аас дээш хожил авч байсан. Мөн түүхэндээ зургаа дахь удаагаа 60-аас дээш хожилтой улирлыг дуусгасан нь энэ байв. Деррик Рөүз сүүлийн 30 жил нэг улиралд 2000 оноо, 600 оновчтой дамжуулалт өгсөн гурав дахь тоглогч болсон. Нөгөө хоёр тоглогч нь Жордан, Леброн. 2011 онд 22 насандаа улирлын үнэ цэнэтэй тоглогчоор шалгарснаар Бүх цаг үеийн түүхэн дэх хамгийн залуу улирлын үнэ цэнэтэй тоглогч болж чаджээ. Гэвч ийнхүү гялалзаж байсан тоглогч өнөөдөр гэмтэл бэртлийн улмаас карьер нь буурах тал руугаа ханджээ. Сүүлийн улирлуудад бэртэл гэмтлээс шалтгаалж, талбайд бүрэн гарч тоглохоо больсон бөгөөд өөрийгөө харуулах боломж түүнд олдоогүй л байна.

NBA-д тоглосон эхний жилдээ дөрвөн сая найман зуун мянга, хоёр дахь жилдээ таван сая нэг зуу, гурав дахь жилдээ таван сая таван зуун мянган долларын цалин авч байж. NBA-д орсноосоо хойш бүх улиралд “Чикаго Буллс” багийг Плей офф-т оруулсан гэх гайхалтай үзүүлэлт түүнд байдаг. Мөн тус багаас түүхэнд хоёрхон үнэ цэнэтэй тоглогч төрж байсны нэг нь Майкл Жордан. Нөгөө нь Сарнай хочит Деррик Рөүз билээ.

С.Төгөлдөр