Сүхбаатар дүүргийн охид багийн тэмцээнд өнгөллөө

Нийслэлийн есөн дүүргийн чөлөөт бөхийн өсвөр үеийн охидын багийн аварга шалгаруулах тэмцээн /2017.11.11/ Баянзүрх дүүргийн спорт хорооны зааланд боллоо. Баянзүрх дүүргийн Биеийн тамир, спорт хорооноос зохион байгуулсан тэмцээнд Баянзүрх, Налайх, Сүхбаатар, Сонгинохайрхан дүүргийн баг өрсөлдснөөс ТСБТСДуС-ийн багш Г.Пүрэвбаатар дасгалжуулагчтай Сүхбаатар дүүргийн баг 30 оноогоор тэмцээний аваргаар тодров.

Ю.Батсайхан, Д.Гал-Эрдэнэ дасгалжуулагчтай Баянзүрх дүүрэг 30 оноогоор аман хүзүүдсэн. Нэг, хоёрдугаар байр эзэлсэн багууд оноо тэнцсэн нь ч медалийн чанараар Сүхбаатар дүүрэг цомын эзэн болсон юм. Харин Э.Батмөнх, М.Хажимухан дасгалжуулагчтай Налайх дүүрэг 28 оноогоор гурав, Н.Баатар дасгалжуулагчтай Сонгинохайрхан дүүрэг 10 оноотой дөрөвдүгээр байрт оров.

МЧБХ, ҮБТДС, Баянзүрх дүүргийн БТСХ хамтран зохион байгуулсан шүүгч бэлтгэх сургалтад хамрагдсан залуу шүүгчид тус тэмцээнийг дэнсэлсэн юм. МЧБХ-ны ерөнхий нарийн бичгийн дарга Б.Батбаяр, үндэсний шигшээ багийн дасгалжуулагч Б.Баттулга, МЧБХ-ны шүүгчдийн зөвлөлийн дарга Ц.Цэрэнхүү нар хүрэлцэн ирж, сургалт болон тэмцээний үйл ажиллагаанд амжилт хүссэнээс гадна шинээр зэрэг авсан шүүгчдэд үнэмлэхийг нь гардуулан өглөө.