Монголд болох Олон Улсын тэмцээнүүдийн тов гарчээ
Монгол Улс энэ онд чөлөөт бөх, жюү жицү, бокс, шатар, байт харваа зэрэг спортын төрлүүдийн олон улсын тэмцээн эх орондоо зохион байгуулахаар төлөвлөжээ.
Чөлөөт бөхийн “Mongolia Open” тэмцээн ирэх зургадугаар сард болно. Тэмцээний эмэгтэйчүүдийн ангилалд чансааны оноо олгодгоороо онцлог.
Сүүлийн жилүүдэд хурдацтай хөгжөөд байгаа жюү жицү бөхийн тэмцээний олон улсын тэмцээн тун удахгүй Монголд зохион байгуулагдах гэж байна. Энэ нэгдүгээр сарын 27-28-нд Улаанбаатар хотод болох Арабын нэгдсэн Эмират улсын холбоотой хамтран зохион байгуулах Азийн нээлттэй тэмцээн юм.
Шатрын олон улсын тэмцээн Улаанбаатарт цөөнгүй удаа зохиогдож байжээ. Тэгвэл Монголын шатрын холбоо, Азийн шатрын холбоотой хамтран Зүүн Азийн өсвөрийн шатарчдын аваргыг тодруулахаар болсон байна. Тэмцээн зургадугаар сарын 17-26-нд болох хуваарьтай.
Байт харвааны ”Mongolian Archery Cup” олон улсын нээлттэй тэмцээн ирэх наймдугаар сард Улаанбаатарт болох аж.
Азийн наадам тохиож байгаа энэ жил Монголын боксын холбоо насанд хүрэгчдийн улсын аварга шалгаруулах тэмцээнийг зохиохгүй байхаар шийджээ. Оны өмнө болсон шилдэг найман боксчны тэмцээнээс шигшээ багийн болон олон улсын тэмцээний сонгон шалгаруулалтаа хийх юм. Харин олон улсын нээлттэй тэмцээнийг 2018 онд Улаанбаатар явуулахаар төлөвлөн, ажиллаж байна гэв.
Т.Ариунтунгалаг
www.zindaa.mn
Холбоотой мэдээ
Сэтгэгдэл ( 0 )