Өсвөрийн бөхчүүд алдарт Каори Ичогийн бэлтгэлд хамрагдлаа

Сонгинохайрхан дүүргийн өсвөр үеийн дөрвөн тамирчин дасгалжуулагч Н.Баатарын хамт МЧБХ, Японы Мияаконжо хоттой хамтын ажиллагааны хүрээнд хамтарсан бэлтгэл хийхээр энэ сарын 7-нд Наран улсыг зорьсон билээ. Манай өсвөрийн тамирчид Мияаконожо хотод очсон өдрийн маргааш “Ниши” ахлах сургуультай танилцсанаас гадна хамтарсан бэлтгэл хийсэн. Тэгвэл өнөөдөр “Минами Кюүшюү” их сургууль дээр олимпийн дөрөв, дэлхийн арван удаагийн аварга, Японы алдарт бөх Каори Ичо хүрэлцэн ирж, өсвөр үеийн 100-аад хүүхдэд сургалт зохион байгуулжээ. Энэ үеэр Мияаконжо хотын дарга Икеда хүрэлцэн ирж, сургалтыг үзэж сонирхсон юм. Түүнчлэн “Бээжин-2008” олимпийн наадмын мөнгөн медальт Томохиро Мацүнага маргааш сургалтыг удирдана.