Б.Эрдэнэтуяа ”ЖАМ, ЖАЯГ, ЖУДАГ...”
Та бүхний сэтгэл оюуныг цэнгүүлэх “Зиндаа найраг” булангийн энэ удаагийн дугаараар Б.Эрдэнэтуяагийн "ЖАМ, ЖАЯГ, ЖУДАГ..." шүлгийг сонордуулъя.
Зоосоор төлдөггүй үйлийн үр гэж бий
Залиар тулдаггүй туйлын үнэн гэж бий
Зээлээр сунадаггүй хүний нас гэж бий
Зэдээр хуурдаггүй нүглийн нүд гэж бий
Зоргоор болдоггүй хүслийн хяслан гэж бий
Зогсоож болдоггүй амьдралын хүрдэн гэж бий
Захирч болдоггүй хүний заяа гэж бий
Заргалдаж болдоггүй хүний төөрөг гэж бий
Зөрж болохгүй тэнгэрийн бошго гэж бий
Зөрчиж болохгүй ертөнцийн хууль гэж бий
Заавал мөрдөх амьдралын жаяг гэж бий
Зайлшгүй зохицох байгалын зохирол гэж бий
Сөрж болохгүй хорвоогийн жам гэж бий
Сөхөрч болохгүй орчлонгийн шалгуур гэж бий
Сөгдөөд нэмэргүй эрлэгийн шүүлт гэж бий
Сүслээд нөмөргүй харийн тэнгэр гэж бий!
Шүүж болдоггүй хүний тавилан гэж бий
Шунаж болдоггүй амьдын жаргал гэж бий
Шилж болдоггүй оноосон зам гэж бий
Шилжүүлж болдоггүй тохоосон үүрэг гэж бий
Бөхөөж болохгүй амин гал гэж бий
Булзаж болохгүй аман андгай гэж бий
Булингартуулж болохгүй ариун цус гэж бий
Бутаргаж болохгүй алтан ураг гэж бий
Мөнхөд манах хүний мөн чанар гэж бий
Мөрлөж сахих хүний ёс жудаг гэж бий
Мохоож болохгүй ясны чин зориг гэж бий
Мөхөөж болохгүй язгуурын чин хүсэл гэж бий!
2017.09.03
Холбоотой мэдээ
Сэтгэгдэл ( 3 )
сайхан шүлэг байна Нэг л зүйл дээр санал зөрлөө Илүү гэж бодолгой бичлээ. Мохоож болохгүй босоо оршихуй гэж бий гээд суулрүү оруулсан бол /чин зориг гэдэг үгийн оронд шүү/ болох бж, Мөн 2 чухал үг харагдсангүй Эрдэнэ, зоригдол, гэсэн том ололууд монгол гүн ухаанд том бр суурь эзэлдэг
Төрийн ордоны сармагчингуудад уншуулж харуулах юмсан.тэр сармагчингуудын сонорт хүргэх хэрэгтэй
Ухаантай бүсгүй байнаа. Монгол хүүхнүүд уншаад авахад нэг их илүүдэхгүй сургамжтай л юм байна.