Якут, Тува, Эрхүүгийн бөхчүүд нэмэгдсэнээр эрчүүдийн барилдаанд гал гарах нь

Найм дахь удаагийн “Монголиа Опен” тэмцээн өнөөдөр /2018.06.09/ “Буянт-Ухаа” спортын ордонд эхэллээ. Тэмцээн хоёр өдөр үргэлжлэх юм.

Энэ жилийн “Монголиа Опен”-д эрэгтэйчүүдийн төрөлд Монгол, Казахстан, Буриад, Якут, Эрхүү, Тувагийн шилдэг бөхчүүдийн гал гарсан барилдаанууд ялангуяа хөнгөн жингүүдэд олноор нь гарах тодорхой боллоо.

Якутаас сүүлийн хоёр жилийн Оросын дэд аварга, оюутны дэлхийн аварга, Виктор Рассадин, 2016 оны ОХУ-ын аварга Егор Пономарев, өсвөр үеийн дэлхийн болон Европын аварга Алексей Копылов тэргүүтэй 10 тамирчин Улаанбаатарт ирээд байна.

Түүнчлэн Александр Медведийн нэрэмжит ОУТ-ий аварга, Беларусийн якут легионер Андрей Бекренев нутгийнхаа бөхчүүдтэй нэгдэж манай оронд хөл тавилаа. Тувагаас энэ жилийн Иван Ярыгиний “Алтан Гранпри”-гийн аварга, 2012 оны оюутны дэлхийн аварга Хуреш-оол Дондук-оол тэргүүтэй 11, Эрхүүгээс Дмитрий Коркин, Улаан-Үд, Рамазан Кадыровын ОУТ-ий медальт Юлиан Гергенов тэргүүтэй дөрвөн бөх зодоглох юм.