100 дахь гоолын эзэн Месси

ОХУ-д болж буй 21 дэх удаагийн хөлбөмбөгийн дэлхийн аварга шалгаруулах тэмцээний “D” хэсэгт өрсөлдсөн Аргентиний шигшээ баг өчигдөр Нигерийг 2:1-ээр хожиж, шөвгийн 16-д шалгарлаа.

Дэлхийн шилдэг хөлбөмбөгчин шагналыг таван удаа хүртсэн алдарт тоглогч Леонел Месси тоглолтын 14 дэх минутад гоол хийсэн нь аргентинчуудад томоохон сэргэлтийг авчирсан. Энэ нь түүний энэ дэлхийн аваргын анхны гоол боллоо. Мөн Мессигийн энэ гоол 21 дэх удаагийн ДАШТ-ий 100 дахь гоолоор тэмдэглэгджээ.

Төрсөн он cap өдөр: 1987.06.24
Төрсөн газар: Аргентин, Росарио хот
Өндөр: 169 см
Жин: 67 кг

Мессигийн анхны алхам

 
Ногоон талбайн домог болсон Диего Марадонагийн залгамжлагч Лионель Месси таван настайгаасаа хөлбөмбөг тоглож эхэлсэн. Биеэр жижиг, турь муутай, дааврын өвчний улмаас давжаа болсон жаахан хүүгийн ногоон талбайг эзэгнэх авьяас тун багад нь илэрсэн. Тэрбээр сургуульд ч ороогүй бага байхдаа хотынхоо "Ньюэллз Олд Бойз" клубийн нэрийн өмнөөс тоглож байсан юм. Түүнийг 11 настайд эцэг эх нь Барселонд нүүж иржээ. Энд ирснээс ердөө хоёр жилийн дараа тэр "Барселон"-ы залуучуудын багт тоглож эхэлсэн.

Залуу тоглогч Месси

2004 оны аравдугаар сард "Барселон"-ы нэгдүгээр багт "Эспаньола"-гийн эсрэг тоглосон нь түүний хувьд том багийн нэрийн өмнөөс ногоон талбайд гарсан анхны тоглолт байлаа. Тэрбээр энэ багийн түүхэн дэх хамгийн залуу гурван тоглогчийн нэг болсон. Дараа жилийнх нь тавдугаар сард үндсэн багт "Альбасете"-гийн хаалганд анхны гоолоо хийхдээ тэрбээр 18 нас ч хүрээгүй байв. Энэ нь мөн л түүнд түүхэнд бичигдэх нэг шалтаг болсон. Өрсөлдөгчийнхөө хаалганд бөмбөг оруулсан хамгийн залуу тоглогч.

Аргентины шигшээд 20 хүртлээ

Аргентины залуучуудын шигшээд тоглохоос өмнө Месси Испанийн үндэсний шигшээ багт орох урилга хүлээж авсан ч татгалзсан. 2004 оны зургадугаар сард тэр залуучуудын багийн бүрэлдэхүүнд багтаж Парагвайн эсрэг тоглоход анх талбайд гарсан. 2005 оны зургаадугаар сард Месси залуучуудын дэлхийн аваргад оролцож зургаан гоолын эзэн, шилдэг довтлогчийн шагнал "Алтан бөмбөг" хүртэж байсан. Чухам энэ үеэс түүнийг домогт Марадонатай зүйрлүүлж эхэлсэн.

2005-2006 он
Месси Аваргуудын лигт есдүгээр сарын 28-нд "Hoy Камп"-ын бүрэлдэхүүнд Италийн "Удинезе" багтай анхны тоглолтоо хийв. Тоглолтын дараа Италийн "Tuttosport" сониноос 21-ээс доош насны тоглогчдоос шалгаруулдаг "Алтан жаал-2005" шагналыг хүртсэн юм. Түүний ард Уэйна Руни, Лукаша Подольски нар орж байлаа. Энэ цаг үеэс хойш хөлбөмбөгийн ертөнцөд Дэлхийн таван удаагийн шилдэг тоглогч болтлоо гялалзаж яваа домогт Мессигийн тухай тоймгүй олон амжилт, адал явдал өрнөсөөр байна...

С.Баяр

Эх сурвалж: Zindaa.mn