Xanadu Mines: Хармагтайн ордод 25 сая ам.долларын хөрөнгө оруулалт хийгээд байна

Xanadu Mines компанийн “Хармагтай”-н орд газрын хайгуулын ажил амжилттай үргэлжилж байгаа гэж тус компанийн удирдлагууд мэдээллээ. Өнгөрсөн дөрвөн жилийн хугацаанд 25 гаруй сая ам.долларын хөрөнгө оруулалтыг уг орд газарт хийсэн байна. Одоогоор зөвхөн судалгаа үргэлжилж, өрөмдлөгийн шатандаа яваа аж. Судалгааны явцад алт болон зэсийн хэд, хэдэн нөөц илэрсэн байна.

“Төслийн эхний шатыг бид 10 жил байхаар тооцсон. Гэхдээ ажил маш амжилттай урагшилж байгаа. Одоогоор өрөмдлөгийн таван нүхтэй байна. Ирэх арваннэгдүгээр сард ч гэсэн бид судлын судалгаагаа үргэлжлүүлнэ. Оны сүүл гэхэд ерөнхий дүр зураг нь тодорхой болох байх” гэж Xanadu Mines компанийн гүйцэтгэх захирал Эндрью Стюарт ярилаа.

Улаанбаатар хотоос урагш 420 км Өмнөговь аймгийн Манлай сумын нутагт орших Хармагтайн зэс алтны орд нь алтны нөөц 38 тонн, зэсийн нөөц нь 348 мянган тонн гэж тогтоогдсон байдаг. Гаднын хөрөнгө оруулагчид төслийн эхний шатны ажилд тун ам сайтай байгаа ажээ.

Австралийн хөрөнгийн биржид бүртгэлтэй Xanadu Mines компани он гарснаас хойш хувьцааны ханш нь алгуур ч гэсэн өсч буй нь сүүлийн гурван жилд байгаагүй сайн үзүүлэлт гэж компанийн зүгээс онцолж байна.

Б.Азаа

zindaa.mn