Ерөнхийлөгч Завхан аймгийн Усан спорт цогцолборын нээлтэд оролцов

Завхан аймагт ажиллаж буй Монгол Улсын Ерөнхийлөгч Х.Баттулга Завхан аймгийн Улиастай сумын Богдын гол багт нээлтээ хийсэн Усан бассейн бүхий спорт цогцолборын нээлтийн ёслолд оролцлоо.

Энэхүү спорт цогцолбор нь 400 хүний суудалтай усан бассейны заал, 500 хүний суудалтай спорт заалтай, жүдо, самбо бөх, гимнастик болон бүх төрлийн спортоор хичээллэх нэмэгдэл заалтай, иж бүрэн агааржуулалтын системтэй, усан халаалттай спорт цогцолбор болжээ.

Завхан аймгийн Засаг дарга Д.Батсайханы хэлснээр энэхүү цогцолбор нь хүүхэд, багачуудын хүч, хөдөлмөрийн үр дүнд баригдсан томоохон бүтээн байгуулалт юм байна.

Учир нь, 2011 онд Улаанбаатар хотын Сүхбаатарын талбайд 999 морин хуурч хуурдаж түмэн олноо цэнгээсний урамшуулалд Засгийн газар шийдвэр гаргаж, улсын төсөвт 7.2 тэрбум төгрөг суулгасан байна.

Барилгын ажил 2012 онд эхэлж, ийнхүү ашиглалтад орсноор зөвхөн Завхан нутгийнхан бус бүсийн хэмжээнд усан спорт болон спортын бусад төрлөөр стандартын дагуу уралдаан, тэмцээн зохион байгуулах боломжтой болж байгаа аж.

Монгол Улсын Ерөнхийлөгч Х.Баттулга барилгын нээлтийн ёслолд оролцож, спорт цогцолборын бүтээн байгуулалтыг сонирхох үеэр Завхан аймгийн усан спортын тамирчид усан бассейнд анхны сэлэлтээ хийж, цаашдаа байнгын бэлтгэл хийх боломжтой болсондоо баяртай байгаагаа хэлсэн юм.

М.Бүүвэй

www.zindaa.mn