Барселона клуб Тоттенхэмийг талбайд нь буулган авлаа

Аваргуудын лигийн хэсгийн хоёр дахь тоглолтын хүрээнд Испанийн Барселона клуб Тоттенхэм клубийн талбайд зочлон тоглож 4:2-оор хожжээ. Английн Уембли цэнгэлдэхэд болсон тоглолтыг 82 мянган хүн үзэж сонирхсон байна.

Тоглолтын агуулгын хувьд хоёр баг тэнцүүхэн байсан ч богино хугацаанд олон гоол алдсан Тоттенхэм клуб довтолгооны санаачлага арай илүү тоглосон юм. Тоглолт эхлээд ердөө удаагүй байхад буюу хоёр дахь минутад зочин багийн Жорди Альбагийн дамжуулалтаар Филипп Коутиньо гоол оруулж тооны харьцааг нээсэн. Гоол алдсан эзэн багаас Харри Кейн гоолын боломж үүсгэсэн ч чулуу болгож чадсангүй. Тоглолтын 28 дахь минутад нүүрний шугам даван гарах гэж байсан бөмбөгийг Филипп Коутиньо дамжуулалт болгож улмаар Иван Ракитич тооны харьцааг 2:0 болгосон юм. Хоёр гоол алдсан эзэн баг гоолын хэд, хэдэн аюултай боломж үүсгэсэн хэдий ч гоол болж чадсангүй. Тоглолтын 31 дэх минутад гоол оруулсан ч отон тоглолтод орсон учир гоолыг нь тооцоогүй юм. Улмаар тоглолтын эхний үед өөр гоол оролгүй энэ дүнгээрээ өндөрлөжээ

Тоглолтын хоёрдугаар үед эзэн багийн тоглолтын найруулга, гоолын санаачилгаа эхний үеэс дээр байлаа. Эзэн багийн Эрик Ламела тоглолтын 52 дахь минутад Харри Кейнд оновчтой дамжуулалт өгч тооны харьцааг бага боловч ойртуулав. Эздийн гоолын баяр дуусаагүй байхад эхний гоолын дамжуулалтыг өгсөн Жорди Альба Лионель Мессид мөн л оновчтой дамжуулалт өгч гоолын зөрүүг холдуулав. Зочид үүнээс хойш дахин аюултай боломж үүсгэсэн ч ашиглаж чадсангүй. Харин тоглолтын 66 дахь минутад Өмнөд Солонгосын шилдэг хөлбөмбөгч Сон Хён Мин-ий дамжуулалтаар Эрик Ламела гоол оруулж эздийн найдваырг сэргээсэн юм. Үүнээс хойш хоёр баг харилцан довтолсоор байв. Тоглолт дуусч байх мөчид буюу 90 дэх минутад Жорди Альбагийн дамжуулалтыг Лионел Месси чулуу болгож тоглолтын эцсийн цэгийг тавьжээ. Өнгөрсөн шөнийн тоглолтод Жорди Альба гурван гоолын дамжуулалт өгч өөрийн шилдэг тоглолтоо үзүүлсэн. Ингэснээр “В” хэсгийг Барселона клуб зургаан оноотой итгэл төгс тэргүүлж байгаа бол Английн Тоттенхэм клуб хоёр дараалан хожигдож нэг ч оноо аваагүй байна. Хоёр гоол оруулсан Лионел Месси гурван гоолтой мэргэн буучдын жагсаалтыг тэргүүлэгчдийн эгнээнд бичигдлээ.

Б.Азаа

zindaa.mn