Таканоива А.Баасандорж Харүмафүжи аваргыг шүүхэд өглөө

 Монголын сүмоч Таканоива А.Баасандорж ёкозүно Харүмафүжи Д.Бямбадоржоос 30 сая иений нөхөн төлбөр нэхэмжилж, шүүхэд хандаж магадгүй байгаа талаар өнөөдөр манай сайт мэдээлсэн билээ. (ЭНД-ээс унших) Тэгвэл, хоёр цагийн өмнө Асахи Шимбун сонин үүнийг баталсан мэдээлэл нийтэллээ.

Хоёр тал тохиролцоонд хүрч чадаагүй тул өнөөдөр /2018.10.04/ Таканоива А.Баасандорж Токиогийн дүүргийн шүүхэд хандаж, Харүмафүжи Д.Бямбадоржоос 24.13 сая иений нөхөн төлбөр нэхэмжилсэн байна.

Өдгөө 34 настай ёкозүна Харүмафүжи болсон хэрэгт хариуцлага хүлээн, 2017 оны аравдугаар сарын 27-ны өдөр албан ёсоор зодгоо тайлсан билээ.

Эмчилгээний зардлаас гадна Таканоива караоке бааранд удирдлагаар цохиулж гэмтэл авсны улмаас хоёр башё өнжиж, жүрёо зиндаа руу зэрэг буурсны нөхөн төлбөрийг Харамүфүжигээс мөн нэхэмжилж байгаа аж. Есдүгээр сард болсон тэмцээний үеэр тэрбээр макүүчи зиндаанд эргэн дэвшиж, маэгаширагийн 13-т эрэмблэгдсэн юм.

Таканоивагийн өмгөөлөгчийн хэлснээр 2017 оны сүүлээр Харүмафүжигийн өмгөөлөгч Таканоивад шүүхэд хандалгүй, тохиролцохыг санал болгосон байна. Энэ оны гуравдугаар сард хоёр тал яриа хийж эхэлсэн ч ямар нэгэн тохиролцоонд хүрээгүй тул ийн шүүхэд хандахад хүрчээ.

Эх сурвалжийн мэдээлснээр бол 2018 оны наймдугаар сард Таканоива Токиогийн доод шатны шүүхэд хандан, иргэний хэрэгт зуучлах хүсэлт гаргасан аж. Гэвч Харүмафүжигийн талаас есдүгээр сарын 26-нд болсон хэргийн сонсгол дээр хэн ч ирээгүй тул хуулийн дагуу Таканоиваг шүүхэд хандахаас аргагүй болсон гэжээ.

Харүмафүжигийн өмгөөлөгчид одоогоор албан ёсоор мэдэгдэл ирээгүй байгаа тул энэ талаар ямар нэгэн мэдээлэл өгөхөөс татгалзсан байна. Өмнө нь Харүмафүжи Таканоивад 500 мянга иений нөхөн төлбөр төлж байсан билээ.