“Оюу толгой”-н туслан гүйцэтгэгч компаниуд хөдөлмөрлөх эрхийг зөрчиж байна гэв

Монголын эрчим хүч, геологи, уул уурхайн үйлдвэрчний эвлэлийн холбоо /МЭХГУУҮЭХ/-ноос өнөөдөр /2010.10.08/ хэвлэлийн бага хурал зарлаж, “Оюу толгой” компанийн туслан гүйцэтгэгч компаниуд хөдөлмөрлөх эрхийг нь зөрчиж байгаа талаар мэдээллээ. Одоогийн байдлаар “Оюу толгой” компанид гадаад, дотоодын нийт 145 компани туслан гүйцэтгэгч, гэрээт компаниар ажиллаж байна. Эдгээрт ажилладаг 13 мянган ажилтнууд хөдөлмөрлөх эрхээ зөрчүүлж байгаа ажээ.

“Оюу толгой компани Монголын уул уурхайн титэм юм бол уул уурхайн салбарт зөв жишиг тогтоох ёстой. Туслан гүйцэтгэгч компанийн ажилчид “Оюу толгой” компаниас 2-3 дахин бага цалин авдаг. Ижил төстэй үйл ажиллагаа явуулдаг гаднын томоохон компаниудын ажилчид манайхаас 5-10 дахин их цалин авдаг. Энэ ялгаа заагийг арилгаад Монгол ажилчид эх орондоо хөдөлмөрлөх эрхээ хангуулж, хөдөлмөрөө зөвөөр үнэлүүлэх ёстой” гэж МЭХГУУҮЭХ-ны дарга Х.Буянжаргал ярьсан юм.

Өнгөрсөн есдүгээр сарын 18-21-ний өдрүүдэд Оюу толгой төслийн менежментийн баг, Олон улсын аж үйлдвэрийн салбарын үйлдвэрчний эвлэлийн холбоотой хамтран ажиллахаар болоход Оюу толгой компанийн нөхцөл байдалтай танилцсан байна. Манай талаас туслан гүйцэтгэгч компанийн саналыг тавьсан ч судалж үзнэ гэх хариу өгчээ. Гэтэл хүсэлт тавьснаас хойш сар гаруйн хугацаа өнгөрөхөд хариу өгөхгүйгээр барахгүй шаардлага тавьсан ажилчдыг туслан гүйцэтгэгч компаниуд хяхаж хавчих тохиолдол гарсныг үйлдвэрчний эвлэлийн байгууллага мэдэгдсэн юм.

Энэ шалтгааны улмаас МЭХГУУ-н үйлдвэрчний эвлэлийн холбоо Оюу толгой компанийн ТУЗ-ийн дарга Г.Батсүх, гүйцэтгэх захирал Армандо Торрес, Оюу толгойн ордыг ашиглах, хөрөнгө оруулалтын гэрээний хэрэгжилтийг шалгах, санал дүгнэлт боловсруулах УИХ-ын ажлын хэсэгт шаардлага хүргүүлэхээр болжээ. Таван зүйл бүхий уг шаардлагад оноос өмнө ямар нэгэн хариу өгөхгүй бол хөдөлмөрлөх эрхээ хангуулахаар олон улсын байгууллагад хандана гэдгээ мэдэгдсэн юм.

Б.Азаа

zindaa.mn