Чөлөөт бөх: О.Насанбурмаа ДАШТ-ээс 4 медаль хүртсэн анхны МОНГОЛ ТАМИРЧИН боллоо

Өнөөдөр онцгой өдөр болж байна. “Будапешт-2018” бөхийн чөлөөт барилдааны Дэлхийн аварга шалгаруулах тэмцээн /ДАШТ/-ий дэвжээнээ Монголын багийн гурав дахь медальтан тодорлоо.

Эмэгтэйчүүдийн 72 кг-ын жинд зодоглосон ДАШТ-ий гурван хүрэл медальт, Монгол Улсын Гавьяат тамирчин Очирбатын Насанбурмаа алтан медалийн төлөөх барилдаанд ДАШТ-ий хүрэл медальт, Пан-Америкийн гурван удаагийн аварга, Канадын К.Жюстинаг барсангүй. Барилдааныг 4:2 харьцаагаар канад бөх илүүрхэж, манай бөх мөнгөн медаль хүртлээ. Энэ жингийн урьдчилсан болон хагас шигшээ барилдаан өмнөх өдөр /2018.10.23/ болж, шинэ дүрмийн дагуу өнөөдөр медалийн төлөөх барилдаан болж байгаа юм.

О.Насанбурмаа бол энэ удаагийн дэлхийн аваргыг зорьсон тамирчдаас чөлөөт бөхийн ДАШТ-д ХАМГИЙН ОЛОН буюу 10 удаа оролцож байгаа цорын ганц тамирчин. 

• (Гуанжоу-2006, Токио-2008, Москва-2010, Стамбул-2011, Страткон-2012, Будапешт-2013, Ташкент-2014, Лас-Вегас-2015, Парис-2017, Будапешт-2018)

Мөн тэрбээр Монголын спортын түүхэн дэх олимпийн төрлийн ДАШТ-ээс ДӨРВӨН МЕДАЛЬ хүртсэн АНХНЫ тамирчин болж байна. Жүдо, чөлөөт бөхийн төрлөөр дэлхийн дэвжээнээс гурван медаль хүртсэн зургаан тамирчин Монгол Улсаас тодорсон байдаг. Тэд,

• Хөдөлмөрийн баатар С.Батцэцэг (Чөлөөт бөх, 2 алт, 1 мөнгө)
• З.Ойдов (Чөлөөт бөх, 2 алт, 1 хүрэл)
• Х.Баянмөнх (Чөлөөт бөх, 1 алт, 2 мөнгө)
• Д.Сумъяа (Жүдо, 1 алт, 2 хүрэл)
• О.Бурмаа (Чөлөөт бөх, 1 мөнгө, 2 хүрэл) нар юм.

Гавьяат тамирчин О.Насанбурмаагийн ГОЛ АМЖИЛТУУД

• Дэлхийн аварга шалгаруулах тэмцээний 3 хүрэл, 1 мөнгөн медаль
  

67 кг: Токио 2008 - Хүрэл медаль
63 кг: Стамбул 2011 - Хүрэл медаль
67 кг: Будапешт 2013 - Хүрэл медаль
72 кг: Будапешт 2018 -  Мөнгөн медаль

• "Гуанжоу-2010" Азийн наадмын мөнгө

• Ази тивийн аварга шалгаруулах тэмцээний алт, мөнгө, хүрэл медальтай.