Эль Класико: Луйз Суарезын хет-трик Барселонаг ялалтад хөтлөв
Испанийн төдийгүй, дэлхийд үзэгчдийнхээ тоогоор тэргүүлдэг “Эль класико”-д Луйз Суарез хет-трик толилуулж Барселона клуб ээлжит ялалтаа байгууллаа. Багийн гол цөм болсон португаль од Роналдуг зарсан Реал Мадрид өнгөрсөн шөнө ч тийм сайн тоглосонгүй. Хамгаалалт болон дундын шугамдаа хэд, хэдэн алдаа гаргаж эцсийн дүндээ Барселона ялалт байгуулсан юм.
Тоглолтын гоолын салхийг Филипп Коутиньо оруулсан. Түүнд гоолын дамжуулалтыг Жорди Альба өгчээ. Эхний гоолоос хойш эзэн багийн довтолгоо улам ширүүсч хэд, хэдэн удаа хаалга руу довтлов. Тоглолтын 29 дэх минутад Реал Мадридын хамгаалагч Фернандез Иглесиас 16 метрийн шугам дотор алдаа гаргаж 11 метрийн торгуулийн цохилтыг эзэн багт өгсөн юм. Торгуулийн цохилтыг Луйз Суарез чулуу болгож эзэд итгэл төгс тэргүүлж эхэллээ. Эхний үе энэ хэвээрээ өндөрлөсөн юм.
Тоглолтын хоёрдугаар үе эхлээд 50 дахь минутад зочин багийн довтолгоо үр дүнгээ өгч Марсело гоол оруулснаар тооны харьцааг бага боловч ойртууллаа. Гоолын зөрүү ойртсоноос хойш хоёр багийн аль, аль нь үр дүнтэй довтолгоо өрнүүлсэн. Ялангуяа тоглолтын 61 дэх минутад Луйз Суарез гоол оруулах сайхан боломжоо алдсан юм. Тоглолтын 74 болон 82 дахь минутад Серхи Робертогийн дамжуулалтаар Луйз Суарез хоёр гоол оруулан эзэд итгэл төгс тэргүүлж эхэллээ. Өнгөрсөн долоо хоногийн эхээр гурав дахь хүүхдээ өлгийдөн авсан Луйз Суарез өнгөрсөн шөнийн тоглолтод гурван гоол оруулж чухал тоглолтод хэн гэдгээ харуулсан юм. Тоглолтын эцсийн цэгийг 87 дахь минутад Артуро Видаль тавьж энэ удаагийн “эль класико” Барселонагийн ялалтаар өндөрлөлөө. Барселона клуб ингэснээр 64 жилийн дараа анх удаагаа талбайдаа Реал Мадридыг буулган авсан нь энэ болсон юм. Тэд хамгийн сүүлд 1954 оны хоёрдугаар сарын 02-нд Лес Кортс цэнгэлдэхдээ "Эзэн хаан"-ын багийг буулган авч байжээ.
“Месси бол яах аргагүй дэлхийн шилдэг тоглогч. Гэхдээ энэ багийн бүх тоглогч байрлал бүрдээ шилдэг нь. Бидний ард менежер байна, бид ч энэ багтаа хайртай” гэж Луйз Суарез тоглолтын дараа ярьжээ.
Тоглолтын дараах байдлаар Барселона клуб 21 оноотой болж Ла лигийн хүснэгтийг тэргүүлж эхэлсэн бол “Аваргуудын лиг”-ийн аварга Реал Мадрид 14 оноотой есдүгээрт бичигдэж байна. Реал Мадридын удирдлагууд тоглолтын дараа Лопетегитэй уулзсан ч халах эсэх нь одоогоор тодорхойгүй байгаа ажээ. Харин “Марка” сонин аль хэдийнээ Лопетеги-г явуулах тухай хөндөөд эхэлжээ.
Б.Азаа
zindaa.mn
Холбоотой мэдээ
Сэтгэгдэл ( 0 )