“Утгын чимэг” наадмын шилдэг 10 бүтээл тодорлоо

Монголын зохиолчдын эвлэлийн түүхт 90 жилийн ойн хүрээнд зохион байгуулагдах оны шилдэг богино өгүүллэг шалгаруулах “Утгын чимэг” наадам ирэх сарын 7-ны өдөр болно. Тиймээс тус наадамд ирсэн бүтээлүүдээс 10 уран бүтээлчийн богино өгүүллэгийг дараагийн шатанд сонгон шалгаруулжээ. Энэ удаагийн шилдэг 10 уран бүтээлчид Д.Нацагдоржийн шагналт зохиолч, “Утгын чимэг” наадмын тэргүүн шагналт М.Эрдэнэбат, Монголын зохиолчдын эвлэлийн шагналт зохиолч Т.Бум-Эрдэнэ нарын тэргүүтэй 10 зохиолч шалгарсан байна. “Утгын чимэг” наадмын анхан шатны шалгаруулалтаас СГЗ С.Оюун, С.Дамдиндорж, М.Уянсүх, Л.Эрдэнэбат нарын яруу найрагчид шалгарч гарсан нь нэгэн онцлох үйл явдал юм. Учир нь тэдний хувьд яруу найргийн төрөл зүйлээр бүтээлээ туурвидаг төдийгүй “Болор цом”-ын тайзнаа шүлгээ уралдуулж явсан эрхмүүд ийнхүү үргэлжилсэн үгийн төрөл зүйлд хүчээ үзэж байгаагаараа онцлог юм.

Дашрамд дурдахад “Утгын чимэг” наадам анх 1990 онд “Шувуун саарал” нэртэй зохион байгуулагдаж, Хөдөлмөрийн баатар, нэрт эрдэмтэн, зохиолч Л.Түдэвийн “Эрхий дарам зай” өгүүллэг тэргүүлж байсан түүхтэй. Харин 1993 оноос “Утгын чимэг” нэртэй болж, 2001, 2004, 2007, 2008 онуудад өнжсөн цагаас хойш жил бүр уламжлан зохион байгуулагдсан юм. Тус наадамд Ардын уран зохиолч, Төрийн шагналт, Соёлын гавьяат зүтгэлтэн Б.Догмид гурван удаа тэргүүлсэн нь уг наадмын дээд амжилт юм байна. Ингээд “Утгын чимэг” наадамд шалгарсан 10 уран бүтээлчийн нэрийг хүргэж байна.

1. М.Уянсүх - “Алтан худаг”

2. Ц.Ганболд - “Араатан”

3. Г.Даваасүрэн - “Байлдааны морьд”

4. М.Эрдэнэбат - “Байхгүйн зовлон”

5. Б.Цоожчулуунцэцэг - “Булангийн зогсоол”

6. С.Дамдиндорж - “Гурвын хэмжээс”

7. Т.Бум-Эрдэнэ - “Олон болоорой”

8. П.Батхуяг - “Сүүлчийн зүсэлт”

9. С.Оюун - “Тэнгэрийн хүү”

10. Л.Эрдэнэбат - “Эх оронгүй хүн”

С.УУГАНБАЯР

WWW.ZINDAA.MN