ДАРХАН-УУЛ: Иргэдийн эрүүл мэндэд анхаарч тамхигүй ажлын байр бий болгоно

  Тогтвортой хөгжил 2030 үзэл баримтлал, Төрөөс эрүүл мэндийн талаар баримтлах бодлого, Эрүүл Дарханчууд аймгийн дэд хөтөлбөр, Аймгийн Засаг даргын үйл ажиллагааны хөтөлбөр, Эрүүл мэндийн сайдын 2017 оны 11 дүгээр сарын 23-ны өдрийн А/472 дугаар тушаалын хэрэгжилтийг хангах зорилгоор өчигдөр Нийгмийн эрүүл мэндийн чиглэлээр эрүүл мэндийн байгууллагуудын удирдах ажилтан, эмч мэргэжилтнүүдийг хамруулсан зөвлөлдөх уулзалт аймгийн Эрүүл мэндийн газарт боллоо.

   Уулзалтаар 2019 оны Нийгмийн эрүүл мэндийн чиглэлээр хэрэгжүүлэх үйл ажиллагааны төлөвлөгөөнд, халдварт өвчнөөс урьдчилан сэргийлэх, халдварт бус өвчнөөс урьдчилан сэргийлэх, эрүүл мэндийг дэмжихэд салбар дундын хамтын ажиллагааг хэрэгжүүлэх гэсэн гурван чиглэл гарган эрүүл мэндийн байгууллагууд хэрэгжүүлэхээр болжээ. 2019 оны эрүүл мэндийн байгууллагуудын үйл ажиллагааны төлөвлөгөөнд Чимх давс, ширхэг ёотон аян, хөдөлгөөн өрнүүлэх, диабитийн төв байгуулах, тамхигүй ажлын байр, байгууллагад эрүүл мэндийг дэмжих орчинтой болгох асуудлыг удирдах ажилтны үр дүнгийн гэрээнд тусгаж хэрэгжилтийг хангуулах, Эрүүл байгууллага, эрүүл өрх, эрүүл иргэн, эрүүл гудамж, хоггүй Дархан хот бий болгоход Иргэдийн хурлын төлөөлөгчдийг үйл ажиллагаандаа татан оролцуулах зэрэг олон ажлыг хийж хэрэгжүүлэхээр болжээ.