Согтуугаар тээврийн хэрэгсэл жолоодсон 70 зөрчил илрүүллээ

Амралтын өдрүүдэд Тээврийн цагдаагийн албаны Жижүүрийн шуурхай удирдлагын хэлтэс нийт 507 дуудлага, мэдээ мэдээлэл хүлээн авснаас зам тээврийн ослын шинжтэй 417 дуудлагыг хүлээн авч шалгалаа.

Бүртгэгдсэн зам тээврийн ослын улмаас нийслэл хотод нэг хүний амь нас хохирч, 11 хүн бэртэл гэмтэл авсан ба орон нутагт ноцтой зам тээврийн ослын улмаас нэг хүний амь нас хохирсон хэргүүд бүртгэгдсэн байна. Тухайлбал, Сүхбаатар дүүргийн нутаг дэвсгэр, Чингисийн өргөн чөлөө, Хүүхдийн ордны баруун хойд уулзварт T.Aqua маркийн автомашин N.Tiida, T.Camry, H.Aerocity автомашинууд болон автобустай мөргөлдөж, зорчигч 68 настай Я-н амь нас хохирч, хоёр хүн гэмтжээ.

Мөн Баянхонгор аймгийн Өлзийт сумын нутаг “Цагаан хаалга” гэх газар асфальтан замд T.Pruis маркийн автомашин онхолдож 39 настай эмэгтэй Х-н амь нас хохирсон хэргийг шалгаж байгаа бөгөөд осол хэргийн шалтгаан нөхцлийг үзвэл, орон нутгийн замд жолооч нар хурд хэтрүүлдэг, гүйцэж түрүүлэх үйлдлийг буруу хийсний улмаас замын хажуу, далан руу онхолдох хэлбэрээр дийлэнх хувь нь бүртгэгдэж байна. 

 

 Хөдөлгөөнд оролцохдоо тээврийн хэрэгсэл хоорондын зай барихгүй байх нь урд яваа автомашины араас мөргөх болон бусад осол гаргах эрсдлийг үлэмж нэмэгдүүлдэг. Ихэнх оронд нэг секундэд өмнөх автомашинаа гүйцэж түрүүлж амжихгүй зайг “Хэт ойр” гэж үздэг бөгөөд суурингийн гадна замд өмнөх автомашинаа гүйцэхэд 3 секунд шаардах зайг барих нь зохистой юм. Мөн цагдаагийн байгууллагаас гудамж замд хийсэн хяналт шалгалтаар Замын хөдөлгөөний дүрэм зөрчсөн нийт 3700 зөрчил үүнээс согтуугаар тээврийн хэрэгсэл жолоодсон 70 зөрчлийг илрүүлэн саатуулж ажиллажээ.