Нобелийн шагналтны цолыг хураажээ

АНУ-ын Cold Spring Harbor лаборатори ДНК-г нээсэн, Нобелийн шагналт эрдэмтэн Жеймс Уотсоны цолыг янз бүрийн арьсны өнгөтэй хүмүүсийн оюуны чадамж өөр байдаг хэмээн хэлсний төлөө хурааж авахаар шийдвэрлэжээ.

Энэ оны нэгдүгээр сарын 2-ний өдөр PBS телевизээр гарсан баримтат кинонд 90 настай эрдэмтэн олны дургүйцлийг хүргэсэн энэхүү тайлбарыг хийжээ.

Лабораторийн мэдэгдэлд “Уотсон докторын хэлсэн үг шинжлэх ухаанаар нотлогдоогүй бөгөөд тус лабораторийн багш, ажилтнууд болон оюутнуудын үзэл бодлыг огт илэрхийлээгүй” гэжээ. Мэдэгдэлд дурдсанаар, судлаачийн хүндэт ивээн тэтгэгч, Оливер Грейсийн нэрэмжит хүндэт профессор, гавьяат удирдагч хэмээх цолнуудыг хурааж авчээ. 2007 онд Cold Spring Harbor лаборатори эл эрдэмтнийг Sunday Times өгсөн ярилцлагадаа Африк ирээдүйтэй гэдэгт эргэлзэж байна гэж мэдэгдсэний дараагаар захиргааны үүрэгт ажлаас нь чөлөөлжээ. Тухайн үед судлаач Уотсон “тэдний оюуны чадамж биднийхтэй ижил гэдэг үзэл дээр манай нийгмийн бодлого бүхэлдээ суурилдаг. Гэвч бүх тест тийм биш гэдгийг харуулдаг” гэж мэдэгдэж байжээ.

Жеймс Уотсон орчин үеийн биологи, генетик буюу удамшил зүйн үндэслэгчдийн нэгд тооцогддог. 1953 онд тэрбээр Фрэнсис Крик, Морис Уилкинсоны хамтаар ДНК-ийн молекулын бүтцийг нээсэн бөгөөд 1962 онд тэд физиологи, анагаах ухааны салбарын Нобелийн шагналыг хүртэж байжээ.