ДАРХАН-УУЛ: Гэр бүлийн хөгжлийн асуудлаар 500 иргэн санал өгчээ

Дарханчууд 2019 оныг “Гэр бүлийн хөгжлийг дэмжих жил” болгон зарласан. Энэ дагуу иргэдийн дунд нээлттэй хэлэлцүүлэг зохион байгуулж иргэдээсээ саналыг авсан билээ. Харин энэ сарын 12-19-ний өдрүүдэд жилийн хүрээнд ямар шинэ шинэлэг ажлуудыг хийх талаар “Шинэ амьдрал” НҮТББ, “Хөгжил бизнес төв” НҮТББ хамтран томоохон худалдааны цэгүүд болон коллежуудын оюутнуудыг хамруулсан долоон асуулт бүхий асуумжийг түүврийн аргаар авсан байна. Нийтдээ 500 гаруй иргэд уг асуумжид оролцсон бөгөөд өчигдөр /2019.01.22/ судалгааныхаа дүнг болон иргэдээс ирсэн хүсэлтүүдийг зохион байгуулагчид аймгийн Засаг дарга С.Насанбатад хүлээлгэн өглөө.

Иргэд өрхийн бичил бизнесийг бодлогоор дэмжих замаар ажлын байрыг бий болгох, архи согтууруулах ундаатай тэмцэх, байгууллага бүр ажилтан албан хаагчдынхаа ахуй амьдралд анхаарал хандуулж дэмжлэг үзүүлэх, үлгэр жишээ гэр бүлүүдийн туршлагыг залуу үеийнхэндээ таниулан сурталчлах зэрэг олон саналыг дэвшүүлжээ. Эдгээр саналуудыг бодлогын хүрээнд эрэмбэлэн хэлэлцүүлгээс гарсан саналуудтай нэгтгэж төлөвлөгөөнд тусгахаа аймгийн Засаг дарга илэрхийлж, цаашид төр, төрийн бус байгууллагууд хамтран иргэд рүү чиглэсэн олон ажлуудыг хийх талаар ярилцсан юм.