С.Цэрэнчимэд “Бага дэлхийн аварга”-аас АЛТАН МЕДАЛЬ хүртлээ

Иван Ярыгины нэрэмжит 30 дахь удаагийн Гранпри тэмцээний гурав дахь өдөр буюу өнөөдөр /2019.01.26/ эмэгтэйчүүдийн 57 кг-ын жинд өрсөлдсөн насанд хүрэгчдийн ДАШТ-ий алт, мөнгө, 23 хүртэлх насны ДАШТ-ий хүрэл, залуучуудын ДАШТ-ий алт, өсвөр үеийн ДАШТ-ий хүрэл медальт, “Алдар” спорт хорооны тамирчин, Монгол Улсын Гавьяат тамирчин Сүхээгийн Цэрэнчимэд алтан медаль хүртэж, Монгол Улсын төрийн дууллаа эгшиглүүлэв.

Иван Ярыгиний нэрэмжит тэмцээнийг чөлөөтийнхөн “Бага дэлхийн аварга” гэж нэрлэдэг, дэлхийн шилдгүүд ирж барилддаг, чансаа өндөр тэмцээн.

 С.Цэрэнчимэд ийнхүү аварга болсноор Монголын тамирчдын “Бага дэлхийн аварга”-аас хүртэж буй 13 дахь алтан медалийг эх орондоо авчирч байна.

Түүнчлэн тэр Красноярскийн тэмцээнээс медалийн иж бүрэн цуглуулгатай боллоо. С.Цэрэнчимэд өмнө нь 2014 онд мөнгө, 2016 онд хүрэл медаль хүртэж байв.

Манай бөх энэ удаа Красноярскт барилдахдаа шөвгийн наймд ДАШТ-ий хүрэл медальт, АНУ-ын Бека Литерсийг 9:3-аар, хагас шигшээд өнгөрсөн жилийн 23 хүртэлх насны дэлхийн аварга, Норвегийн Грейс Булланыг цэвэр, шигшээ барилдаанд өнгөрсөн жилийн Оросын аварга Ольга Хорошавцеваг 10:5-аар ялсан юм. Энэ жинд барилдсан өсвөр үеийн ДАШТ-ий хүрэл медальт, Баянхонгор аймаг, “Хонгор нутаг” дэвжээний тамирчин 18 настай Б.Хонгорзул хүрэл медалийн төлөөх барилдаанд өнгөрсөн жилийн ДАШТ-ий мөнгөн медальт Болгарын Бильяна Дудовад 9:13-аар ялагдлаа.