Ярыгины ОУТ | С.Батцэцэг хошой АЛТАН МЕДАЛЬТАН болов

Иван Ярыгины нэрэмжит 30 дахь удаагийн Гранпри тэмцээний гурав дахь өдрөө үргэлжилж байна. Өнөөдөр /2019.01.26/ Гавьяат тамирчин С.Цэрэнчимэд  57 кг-д тэргүүлж алтан медаль хүртсэн бол хэсэг хугацааны дараа эмэгтэйчүүдийн 68 кг-ын жинд өрсөлдсөн “Лондон-2012” олимпийн наадмын хүрэл медальт, ДАШТ-ий хошой алт, нэг мөнгөн медальт, “Хилчин” спорт хорооны тамирчин, Хөдөлмөрийн баатар, Гавьяат тамирчин С.Батцэцэг алтан медаль хүртэж, тус тэмцээний хошой аварга боллоо.

Өнгөрсөн жил ДАШТ-д жин өгсч, 68 кг-д зодоглох болсон С.Батцэцэг хоёр дахь тэмцээндээ ийнхүү түрүүлэв.

Тэрбээр 2015 онд тус тэмцээнд аваргалж байсан бөгөөд дөрвөн жилийн дараа дахин өнгөллөө. С.Батцэцэг Красноярскт Японы Рио Ватариг 8:3-аар, нутгийн дүү нар болох ОУХМ Э.Дэлгэрмааг 3:0-ээр, спортын мастер Э.Даваанасанг цэвэр ялсан юм. Ингэснээр 68 кг-ын жинд Монголын гурван бүсгүй алт, мөнгө, хүрэл медаль хүртэв. “Алдар” спорт хорооны тамирчин Э.Даваанасан Гранпригээс анхны мөнгөн медалиа зүүж байна. 

Өнгөрсөн долоо хоногт тус хотод болсон Миндиашвилигийн ОУТ-д түрүүлсэн “Хасу-Мегастарс” клубийн тамирчин Э.Дэлгэрмаа хүрэл медалийн төлөөх барилдаанд “Инчён-2014” Азийн наадмын аварга Японы хашир туршлагатай бөх Ватариг 4:3-аар илүүрхснээр долоо хоногийн дотор “давхар цохилт” хийлээ.