Ярыгины ОУТ | Б.Батмагнай туршлага зааж, хүрэл медаль хүртэв

ОХУ-ын алдарт бөх Иван Ярыгины нэрэмжит 30 дахь удаагийн чөлөөт бөхийн Гранпри тэмцээн ОХУ-ын Красноярск хотод энэ сарын 24-27-ны өдрүүдэд болж байна.

Эрэгтэйчүүдийн 65 кг-ын жингийн хүрэл медалийн төлөөх барилдаанд Монголын хоёр тамирчин хоорондоо хүч үзэв.

Азийн АШТ-ий хүрэл медальт, “Алдар” спорт хорооны тамирчин ОУХМ Батчулууны Батмагнай, өсвөр үеийн Азийн аварга, “Хүч” спорт хороо, “Арслан” клубийн тамирчин ОУХМ Төмөр-Очирын Тулга нар /2019.01.25/ манайхны эчнээ танил тувагийн Начын Кууларт ялагдсан билээ. Харин манай хоёр тамирчин хоорондоо медальтай үлдэх эсэхээ шийдэх үзэв. Барилдаанд насаар ах, туршлагаар илүү Б.Батмагнай 4:2-оор яллаа. Б.Батмагнай өнгөрсөн жил тус тэмцээний хүрэл медалийн төлөөх барилдаанд ялагдаж байсан бол энэ удаа алдаагаа засч, шагналын тавцанд зогсох эрхтэй боллоо.

30 дахь удаагийн тэмцээнд эрэгтэйчүүдийн зургаа, эмэгтэйчүүдийн найман жингийн барилдаан болоход Монголын бөхчүүд хоёр алт, хоёр мөнгө, найман хүрэл медаль хүртээд байна. Тэмцээний сүүлийн өдөр буюу өнөөдөр /2019.01.27/ манай таван тамирчин хүрэл медалийн төлөө барилдана.

Тэмцээний сүүлийн өдрийн тоглолтын хуваарь /Нэгдүгээр сарын 27, Ням гараг/

10:00-10:15 - Эрэгтэйчүүдийн 74, 86, 92, 97, эмэгтэйчүүдийн 72, 76 кг-ын хоёр дахь өдрийн жин үзэлт

13:00-15:00 - Эрэгтэйчүүдийн 74, 86, 92, 97, эмэгтэйчүүдийн 72, 76 кг-ын хагас шигшээ, хүрэл медалийн төлөөх барилдаан

16:00-18:00 - Эрэгтэйчүүдийн 74, 86, 92, 97, эмэгтэйчүүдийн 72, 76 кг-ын жингийн шигшээ барилдаан