М.Бундмаа “Их дуулга”-аас дахин алт авч 5000 долларын эзэн боллоо

Олон улсын жүдо бөхийн холбооны “Их дуулга” ангилалд багтах дөрвөн тэмцээн жил бүр болдгоос энэ оны хоёр дахь нь өнгөрсөн бямба гарагт ОХУ-ын нийслэл Москва хотноо эхэлсэн бөгөөд гавьяат М.Бундмаа дахин алтан медалийн эзэн болж “Их дуулга”-аас хос алттай боллоо. Тэрбээр 2011 оны эхний “Их дуулга” Францын нийслэл Парис хотноо хоёрдугаар сард болоход эмэгтэйчүүдийн 52 кг-д түрүүлсэн юм. Москвагийн “Их дуулга”-д дэлхийн 63 орны эрэгтэй 276, эмэгтэй 183, нийт 459 жүдоч хүч сорьж байна. Түрүүлсэн тамирчин олимпийн эрхийн чансааны оноогоо 300-гаар ахиулах боломжтой. Тус тэмцээний шагналын сан өндөр, аваргын алтан медалийг 5000 ам.доллар дагалддаг. Тиймээс ч олон орны тамирчид “Их дуулга”-ыг зорьдог уламжлалтай. Энэ удаагийн тэмцээнд аваргын алтан медаль хүртсэн  М.Бундмаагаас  гадна Ц.Мөнхзаяа мөнгө, Д.Төмөрхүлэг хүрэл медалийн эзэд болжээ.

Эх сурвалж: МОНЦАМЭ